Doarjjaortnega mihttomearri lea aktiivvalaš ja mearrediđolaš ovttasbargu regionála ja báikkálaš eiseválddiiguin nannen ja ovddidan dihte sámi kultuvrra, giela ja servodateallima.
Doarjjaortnegis lea earret eará juolluduvvon 125 000 ruvdnosaš doarjja Lávgu AS Álttá sámi giella- ja kulturguovddážii. Sii galget buvttadit mearrasámi podkásta mas leat 10-12 oasi.
Podkásta ulbmil lea ovddidit mearrasámi giela, kultuvrra ja historjjá, ja dieinna lágiin nannet mearrasámi identitehta, ja maiddái váikkuhit soabaheapmái servodagas. Prošeavtta fágalaš ulbmil lea dokumenteret ja juohkit dieđuid mearrasámi giela, kultuvrra ja historjjá birra.
Lávgu AS ja Návuona giellaguovddáš leat Sámedikki initiatiivva ja doarjaga vuođul dál bargamin prošeavttain man namma lea Mearrasámi vahkku, ja man ulbmil lea ovddidit mearrasámi giela, kultuvrra ja historjjá Návuona ja Álttá guovllus. Dat dahkkojuvvo doallovahkuid bokte. 2025:s lágiduvvojedje earret eará ládjogahpir- ja datneárpogiehtabáddekursa, logaldallamat, mearrasámi giellamállásat ja Sáhkku-speallan.
Jagis 2026 galgá sis leat mearrasámi mánnu, juhkkojuvvon njealji vahkkui jagis.
Vahkkuin lea vuođđun Sámi giellavahkku konseapta, mas lágiduvvojit iešguđetlágan doalut dáid vahkuid. Mearrasámi vahkku/mánnu oktavuođas galget sii gaskkustit ja oainnusmahttit mearrasámevuođa dáin guovlluin, resurssaid nugo olbmuid, dávviriid ja historjjáid bokte.
Mearrasámi áŋgiruššan mainna Lávgu lea bargan maŋemus jagi, lea dagahan ahte leat fuomášan podkásta-prošeavtta, maid dál háliidit duohtan dahkat.
Maren Benedicte Nystad Storslett
Ørjan Marakatt Bertelsen
– Sámi giella, kultuvra ja historjá riddoguovlluin lea garrasit dáruiduhtton, ja ollu das mii guoská sámi gillii ja kultuvrii lea jávkan. Sihke podkásta ja Mearrasámi vahkku galget oainnusmahttit ja loktet mearrasámi kultuvrra ja giela dáin guovlluin, dadjá sámediggeráđđi Maren Benedicte Nystad Storslett (NSR).
Doarjjaortnega ohcanáigemearri lea skábmamánu 3. b. 2026 dii. 15.30, ja ohcamat meannuduvvojit dađistaga.
Juolluduvvon doarjagat doarjjaortnegis Regionála ovddidanprošeavttat: