– Mii háliidit doarjut lágidemiid dahje doarjjabáikkiid gos digaštallet dahje gieđahallet raportta sisdoalu, dahje gos ságastallet soabaheami birra. Dát sáhttet leat gulahallanságastallamat, álbmotčoahkkimat, kulturlágideamit dahje sullasaččat, dadjá Myrnes Balto.
Sámediggi mearridii reviderejuvvon bušeahtas várret 1 miljovnna ruvnno doarjun dihtii deaivvadanbáikkiid gos digaštallet Duohtavuođa- ja soabahankommišuvnna raportta sisdoalu. Myrnes Balto ávžžuha servviid, kulturásahusaid, giliservviid, giellaguovddážiid dahje almmolaš aktevrraid ohcat doarjagiid čakčii 2023.
– Dál lea rahppojuvvon ohcan láhkái, ja sávan ahte ollugat leat beroštuvvan. Mii sávvat dieđusge ollu lágidemiid nu, ahte nu ollugiin go vejolaš lea vejolašvuohta searvat diekkár deaivvadanbáikái iežaset báikegottiin. Jáhkán dán šaddat dehálaš vuođđun boahttevaš soabahanproseassas, dadjá Myrnes Balto.
Ruđat leat juhkkojuvvon guovtti ohcanvuđot ortnegii: Doarjja kulturdoaimmaide ja ásahusovddideapmi.
– Ásahusat ja organisašuvnnat mat ožžot njuolggodoarjaga Sámedikki kulturbušeahtas fertejit ohcat ruđaid ásahusovddidanortnegis. Buohkat sáhttet ohcat kulturdoaibmaortnega bokte, dadjá Myrnes Balto.
Dagfinn Høybråten jođihii kommišuvnna, mii galggai guorahallat dáruiduhttinpolitihka ja vearrivuođa sámiid, kvenaid ja norggasuopmelaččaid vuostá, ja kommišuvnnas ledje 11 eará fágaolbmo geaid Stuorradiggi lei nammadan.
Kommišuvdna geigii raportta Stuoradiggái geassemánu 1. beaivvi 2023. Raporta lea sáddejuvvon dárkkistan- ja vuođđudanlávdegoddái, mii galgá viidáseappot meannudit raportta. Lávdegoddi háliida bargui fátmmastit buot gustovaš joavkkuid ja buot relevánta lávdegottiid.
Sámedikki dievasčoahkkin galgá meannudit raportta. Sámediggeráđđi bivdá dan oktavuođas sámi servvodaga sáddet cealkámušaid raportta sisdollui ja soabahandoaibmabijuide. Gulaskuddan lea rabas buohkaide ja gulaskuddanáigemearri lea čakčamánu 30. beaivvi 2023.
Loga Duohtavuođa- ja soabahankommišuvnna raportta Stuoradikki neahttasiiddus:
Rapport til Stortinget fra Sannhets- og forsoningskommisjonen
Loga eambbo gulaskuddama birra:
Gulaskuddan – Duohtavuođa- ja soabahankommišuvnna raporta