Juolludeamit juolluduvvojit doarjjaortnega vuolde doarjja prošeavttaide ja ovddidanbargguide mánáidgárddiin, gos doarjaga mihttomearri lea buoret kvaliteahta sámi gielas ja kulturbarggus mánáidgárddiin.
17 iešguđetlágan prošeavtta leat dáinna lágiin juhkkojuvvon; 8 giellaovdánahttinprošeavtta, 1 lea pilohtamánáidgárddi ovdánahttin, 6 leat báikkálaš ovdánahttinprošeavtta main deaddu lea sámi árbevirrui, 2 leat ođđa sámegielat mánaidgárdefálaldaga ásaheami ja 6 leat báikkálaš ovdánahttinprošeavtta mat deattuhit árbevirolaš barggu.
Bajilgovva juolludemiin prošeavttaide ja ovddidanbargui 2022 (PDF, 116 kB)
Lullisámi mánáidgárdi Suaja maanagierte Snåases oažžu doarjaga 300 000 ruvnno. Mánáidgárdi oasálastá Sámedikki mánáidgárdeprošeavttas SáMOS:s, mii galgá rievdadit sámi mánáidgárdestruktuvrra sámi filosofiija ja árbevirolaš máhtu vuođul. Mánáidgárdi lea válljejuvvon njealji pilohtamánáidgárddi prošeavttas ja sii leat dál čađaheame oahpahusa Sámi allaskuvlla bokte. Doarjja galgá gokčat lassigoluid mat mánáidgárdái gártet prošeavtta oasálastima olis.
Guovddáš mánáidgárdi Álttás oažžu 500 000 ruvnno doarjaga eambbo mánáidgárdesajiid ásaheapmái, ja mánáidgárdefálaldaga nannemii Álttás ja mánáid sámi gillii, kultuvrii ja identitehtii. Mikkelsen liiko go Álttá suohkan áigu ásahit eambbo sámi mánáidgárdesajiid.
Mikkel Eskil Mikkelsen
Árvu, Sámediggi
– Sámi mánáidgárdesajit jearahuvvot eanet Álttás dál, eanet váhnemat háliidit mánáideaset sámegielat mánáidgárdefálaldaga. Seammás leat oaidnán ahte sámi mánáidgárdedárbu ii leat vuhtii váldon, dadjá Mikkelsen.
Dáčča mánáidgárdi Namsskogan mánáidgárdi Namsskoganis oažžu 200 000 ruvnno prošektii Lullisámi giellaresurssat ja pedagogalaš ávdnasiid oastin. Mánáidgárdi háliida ahte mánát galget beassat gullat gielaset mánáidgárdeárgabeaivvis, gos mánáidgárdebargit maid galget oahpahallat juohkebeaivválaš sániid huksen dihte mánáid giela.
– Lean hui ilus go eambbo dáčča mánáidgárddit addet mánáideaset sámi giela- ja kulturfálaldaga mánáidgárdeárgabeaivvis, dadjá Mikkelsen.
Ođđa ohcanvuorru dán doarjjaortnegis rahppo guovvamánu álggus 2023. Dalle besset mánáidgárddit mat addet sámegielat fálaldaga sámi mánáide, ja mánáidgárddiide mat háliidit addit fálaldaga mii ovddida sámi giela ja kulturgelbbolašvuođa sámegielat mánáide maid ohcat.
Gažaldagaid dahje jearahallama addá sámediggeráđđi Mikkel Eskil Mikkelsen (NSR), tlf. +47 917 42 161, mikkel.eskil.mikkelsen@samediggi.no