Konsultašuvdna-geatnegasvuohta lea nannejuvvon lágas

Konsultašuvdna-geatnegasvuohta lea nannejuvvon lágas

Odne meannudii Stuoradiggi árvalusa nannet lágas konsultašuvdnageatnegasvuođa buot eiseváldedásiide. Ášši loahpahuvvo dál maŋŋel measta logi jagi konsultašuvnnaid láhkaárvalusa birra. Sámediggepresideanta Aili Keskitalo (NSR) oaivvilda mearrádusa mearkkašit olu, ii dušše Sámediggái, muhto maiddái báikkálaš sámi beroštumiide.

– Konsultašuvnnain lea das sáhka ahte eiseválddit geatnegahttojuvvojit váldit min árrat mielde mearridanproseassaide ja mihttun lea šaddat ovttaoaivilii áššis. Konsultašuvnnat sihkkarastet ahte min oainnut šaddet oassin mearridanproseassain, mat fas dagahit buoret mearridanvuođu, čilge sámediggepresideanta Aili Keskitalo. 

Sámediggepresideanta konstatere odne iluin ahte konsultašuvdnageatnegasvuohta nannejuvvo lágas ja ahte dat galgá gustot sihke stáhtii, fylkagielddaide ja gielddaide. Su mielas nanne demokratiija ahte gielddain dál lea konsultašuvdnareaidu. Deaddil ja stuora govva ihtá 

– Mus lea nana osku ahte sámi searvvit, gilisearvvit, ovttastumit ja boazoorohagat šaddet buorren ovttasbargoguoibmin gielddaide, dadjá sámediggepresideanta Aili Keskitalo.

Otná stuoradiggemearrádus lea oassin Sámi vuoigatvuođalávdegotti guorahallama NOU 2007: 13 čuovvoleamis, mii bođii juo nu áigá go 2007:s. Sámediggepresideanta lea ilus go okta Sámi vuoigatvuođalávdegotti árvalusain dál lea čovdojuvvon, vaikko lea oalle maŋŋit.

– Go mii dál odne beassat leat duhtavaččat bohtosiin, de leat máŋggas geat ánssášit rámi. Lei govda doarespolitihkalaš ovttaoaivilvuohta Sámedikkis mii guorrasii láhkaárvalussii. Háliidan giitit sihke min ovttasbargoguimmiid ja opposišuvnna dan barggu ovddas maid sii leat dahkan sihkkarastit eanetlogu Stuoradikkis. Sihke Guovddášbellodat, Bargiidbellodat ja Olgeš leat dahkan buori barggu Stuoradikkis. Dan seamma leat dahkan sámepolitihkalaš ráđit máŋgga eará bellodagas Stuoradikkis, dadjá sámediggepresideanta.

Gulahallandieđut: Sámediggepresideanta Aili Keskitalo (NSR), mob. 971 29 305.