- Dainna seastit ollu divrras luonddu, jekkiid, muolddu ja boazodoalloguovlluid, seammás go dat lea mielde buorideame fievrrideami infrastruktuvrra Davvi-Norggas beassama, johtolatsihkarvuođa ja gearggusvuođa dáfus, dadjá sámediggeráđđi Maja Kristine Jåma (NSR).

Konseaptaválljenguorahallamiin áigot bargat buoridit dálá ruovdemáđijaid Bådåddjoi ja Áhkánjárgii, ja buoridit E6. Dasa lassin áigot doaibmabidjopáhka bokte buoridit eará dálá infrastruktuvrraid Davvi-Norggas ja bidjat johtui eará vuoruhuvvon doaibmabijuid guovllus maid oaivvildit positiivan vuosttažettiin ássanmillii, logistihkkii ja maiddái sihkkarvuođa dáfus.

- Juohke jagi massá boazodoallu ollu bohccuid luottaid ja erenoamážit ruovdemáđijaid alde. Danne lea buorre go deattuhit doaibmabijuid mat leat mielde eastadeame dán ja mat seammás buoridit sihke olbmuid ja elliid sihkkarvuođa, joatká Jåma.

Sámediggeráđđi illuda viidáset proseassaide ovddasvástideaddji stáhtalaš eiseválddiiguin ovdalgo doaibmabijut ja čovdosat loahpalaččat mearriduvvojit.