Ruđat leat juolluduvvon doarjjaortnegis Doarjja ovdánahttit pedagogalaš ávdnasiid mánáidgárddiide. Doarjjaortnega mihttomearri lea ahte mánáidgárddiide, mánáidgárdeoahpaheddjiide ja oahpahusásahusaide galgá leat álki fidnet pedagogalaš ávdnasiid main lea sámi sisdoallu sámegielaide.
Ann-Elise Finbog
Árvu/Sámediggi
Dán jagi bohte ohcamat 4,8 miljovnna ruvnno ovddas, ja bušeahtta lei 1 540 000 ruvnno. Bušeahttarámma doarjjaortnegii lasihuvvui lagabui 800 000 ruvnnuin, nu ahte oktiibuot juolluduvvui 2 382 300 ruvnno golmma prošektii. Giellamovttiidanávdnasat buot sámi gielaide, ja main lea obbasámi perspektiiva, leat vuoruhuvvon.
– Go 4,8 miljovnna ruvnno ovddas oaččuimet ohcamušaid, de čájeha dat ahte lea stuora beroštupmi mánáidgárdeávdnasiidda main lea sámi sisdoallu ja mat leat sámegielaide. Mun lean ilus go mii sáhtiimet vuoruhit ollu buriid prošeavttaid gaskkas ja ahte mii sáhtiimet lasihit rámma, dadjá sámediggeráđđi Ann-Elise Finbog (SáB).
Dát leat ožžon doarjaga:
Davvi Girji AS lea ožžon 1 186 144 ruvnno girjái Dat somás ovdaskuvlagirji.
Dát lea deaddiluvvon govvagirji jietnapanelain, gohčoduvvon SmartPad. 3-5 jahkásaš mánáid várás. Govvagirjjis leat govat, oanehis teavsttat ja jienat. Girji galgá nannet mánáid njálmmálaš giela ja oahppanmovtta. Dat addá mánáide vejolašvuođa oahppat ođđa sániid ja doahpagiid, ja ságastallat dan birra maid sii oidnet ja gullet. Girji galgá almmuhuvvot sihke davvi-, lulli- ja julevsámegillii.
Grom AS lea ožžon 635 396 ruvnno prošektii Troll i ord – eventyr på brett.
Troll i ord lea giellamovttiidahttinreaidu mánáidgárddiide, skuvllaide ja ruovttuide. Iešguđetlágan giellamovttiidahttima sajáiduhttit girjjálašvuhtii lea dehálaš dovdomearka Troll i ord-reaiddus. Máŋggagielat mánnájoavkkus sáhttet máidnasat doaibmat oktasaš referánsarámman viidásit stoahkamii ja ulbmillaš bargui.
Grom AS háliida viiddidit sámi sisdoalu dainna lágiin ahte ráhkadit golbma breahttaspealu golmma sámi máidnasis mat leat Troll i ord giellareaiddus: Stallo på julaften (davvisámi muitalus), Undervannslandet (lullisámi muitalus) ja Sagnet om Storfuglen (julevsámi muitalus). Breahttaspealu bokte galget maiddái ráhkaduvvot muitaluskoarttat main leat illustrašuvnnat máidnasiin ja gullevaš teavsttat.
Statped lea ožžon 560 760 ruvnno ráhkadit pedagogalaš breahttaspealu golmma sámi gillii.
Speallu lea jurddašuvvon 3-5 jahkásaš mánáide. Mihttomearri lea ahte mánát galget oažžut buoret doabaipmárdusa ja gielalaš dihtomielalašvuođa. Dát leat guovddáš vuođđogálggat lohkan- ja čállinovdáneapmái skuvllas ja fágalaš ovdáneapmái. Spealu barggut galget leat heivehuvvon golmma sámegillii; davvi-, julev- ja máttasámegillii, ja galget leat kultuvrralaččat heivehuvvon, vai mánát dovdet ja nannejit iežaset sámi identitehta.