Prins Sverre Magnus Dusan Reljin, Det kongelige hoff

– Sámi álbmoga bealis háliidetne cealkit váimmolaš lihkkosávaldagaid Prinsa Sverre Magnusii su 18-jagi beaivvi oktavuođas. 18-jagi beaivi markere ođđa ja miellagiddevaš áiggi nuorra olbmo eallimis. Dás ovddasguvlui šaddet olu smávit ja stuorit mearrádusat maid galggat dahkat, ja ođđa hástalusat ja perspektiivvat leat vuordimis. Norgga Gonagasbearraša ja sámi álbmoga gaskkas lea áiggiid čađa šaddan lagas ja buorre oktavuohta, ja mii sávvat Prinsa Sverre Magnusii bures boahtima guossái Sápmái ja Sámediggái oahppan dihte eanet otná sámi servodaga ja demokratiija birra. Mii sávvat Prinsa Sverre Magnusii hui olu lihku boahtteáigái ja illudit čuovvut du ovddasguvlui, dadjaba sámediggepresideanta Silje Karine Muotka (NSR) ja dievasčoahkkinjođiheaddji Tom Sottinen (Bb).

Sámedikki dievasčoahkkinjođiheaddji searvá odne almmolaš lunšii Gonagaslaš šloahtas Prinsa Sverre Magnus 18-jagi beaivvi oktavuođas, mii lea sotnabeaivvi juovlamánu 3. beaivvi. Sámediggi skeŋke prinsii sámeniibbii man Knivsmed Strømeng lea duddjon.