Ráhkis sámi álbmot ja min buori verddet, lihkku sámi álbmotbeivviin!

Sámi álbmotbeaivi lea dál badjel 30 jagi, ja lea šaddan dehálaš, allaárvvosaš ja lunddolaš ávvubeaivi – erenoamážit min mánáide ja nuoraide. Sii fievrredit viidáset otná vieruid boahtteáigái. Sávan sámi mánáide ja nuoraide darvánit aivve buori muittut otná ávvudeamis.

Eanet ja eanet olbmot ohcalit sámevuođa, ja beroštupmi Sámi álbmotbeaivái maid lassána jagis jahkái. Doalut mat loktejit sámi kultuvrra, sámi biebmoárbevieruid, min dáidaga, duoji, ja min gielaid eai beare nanne min iežamet siskkáldas oktavuođaid – muhto dat leat maid mielde easttadeame ovdagáttuid ja boasttuipmárdusaid min birra.

Ávvudeamit odne leat máŋggaláganat, justta nu mo mii ieža leat. Buohkain lea seamma riekti čevllohallat iežas sámi duogážiin ja kultuvrrain, ii gávdno dušše okta vuohkki leat sápmelaš. Mii fertet joatkit ovddidit sámi servodaga rabas ja liekkus servvodahkan gos min olbmot dovdet sii leat bures boahtin. 

Munnje lea hui movttidahtti vásihit mo sámevuohta beassá leat guovddážis ja čuvgejuvvon dáin oktavuođain. Menddo guhkká leat mii leamaš čihkkojuvvon. Dáruiduhttinpolitihka bokte lei Norgga stáda áigumuš assimileret sápmelaččaid, ja dat lea dagahan stuorra vahágiid, maiddái majoritehtaservvodahkii. Norgga álbmot ii leat beassan oahppat ja oahpásmuvvat minguin. 

Boahtte mánu meannuda Sámedikki dievasčoahkkin Duohtavuođa- ja soabahankommišuvnna raportta. Dat lea okta dain deháleamoš áššiin maid Sámediggi meannuda min historjjás. Sámi servodat signalisere dáinna lágiin ahte mis leat čielga vuordámušat eiseválddiide mo min mielas lea buoremussan dál lávket ovddasguvlui. Soabadeapmi lea guhkkitáigge mihttun mii eaktuda ahte dološ vearrivuođat njulgejuvvojit. Dat lea stuorra bargu mas stuorraservodat ja eiseválddit fertejit leat mielde.

Ráhkis buohkat,
Sámi álbmotbeaivi lea min oktasaš beaivi, beroškeahttá riikarájiin. Sámedikki bealis sávan ilolaš ávvudeami!