Sámi nuorat vuostálastet ja gáibidit iežaset jiena gullot ja vuoigatvuođaid vuhtiiváldojuvvot duođasin. Vuoigatvuođaid bealušteapmi gáibida duostilvuođa, erenoamážit go dagat dan iežat álbmoga beales riikka fámuid vuostá, nu mo sámi nuorat dađibahábut leat ferten dahkat dán jagi.

Sámediggepresideanta Silje Karine Muotka, Sámiráđi presideanta Áslat Holmberg, Inuit Circumpolar Ráđi jođiheaddji Sara Olsvig ja sámediggeráđđi Maja Kristine Jåma serve gieskat Arctic Peoples konferánssii Ilulissatas.

Sámediggepresideanta Silje Karine Muotka ja sámediggeráđđi Maja Kristine Jåma searvvaiga gieskat historjjálaš 50 jagi ávvudeapmái Arctic Peoples konferánssas, Ilulissatas Kalaallit Nunaatas/Ruonáeatnamis suoidnemánu 20.-21. b. 2023.

Konferánssa julggaštusas deattuhuvvo man mávssolaš lea addit eamiálbmotnuoraide guovddáš saji min oktasaš boahtteáiggi hábmemis. Mis lea buohkain ovddasvástádus das makkár máilmmi mii guođđit boahttevaš buolvvaide.

Konferánssas dohkkehuvvui Statement of the Arctic Peoples' Conference 2023 - Insidat Issittormiut Ateatsimeersuarnerat 2023 (Arctic Peoples' Conference 2023 julggaštus), ja sáhtát lohkat cealkámuša dán liŋkka bokte.

Sámediggi sávvá lihkku máilmmi álgoálbmogiidda otná beivviin!