Dievasčoahkkima jođihangoddi. Lahttu Jørn Are Gaski (bellodatsorjjasmeahttun áirras), nubbinjođiheaddji Tor Gunnar Nystad (NSR), lahttu Kristin Sara (NSR) ja jođiheaddji Tom Sottinen (Bb). Lahttu Sara Katrine Aleksandersen ii leat mielde govas.
Árvu/Sámediggi
Sámediggi attii diibmá Telemarksforskingii bargun guorahallat manne olbmot geat leat registrerejuvvon Sámedikki jienastuslohkui válljejit dieđihit iežaset eret. Guorahallan galggai maiddái kártet leat go subjektiivvalaš gáibádus ja objektiivvalaš gáibádusat ollašuhtton jienasteddjiid anonymiserejuvvon kártema bokte. Prošeavtta ulbmil lei oažžut ovdan dieđuid mat livčče ávkkálaččat Sámediggái viidáset barggus válggain ja jienastusloguin.
Dievasčoahkkinjođihangoddi bissehii prošeavtta mearrekeahtes áigái politihkalaš rieja geažil. Nordkalottfolket sáddii gáibádusa gaskaboddosaš mearrádusa birra diggegoddái, mii gávnnahii ahte gáibádus gaskaboddosaš mearrádusa birra ii vuhtiiváldojuvvon.
Dievasčoahkkinjođihangoddi oaivvilda ahte politihkalaš kontovearsat guorahallama, mediadigaštallama ja Sámedikki stevdnema ektui ja Nordkalottfolket ávžžuhusa guorahallama boikohttet dagahit dan ahte sáhttá oažžut vuollegis vástidanproseantta ja bonju vástádusjuogu mii ii leat representatiiva, mii dagaha ahte bohtosiin ii leat nu olu árvu.
– Mii oaidnit ahte politihkalaš riedja maid dát prošeakta lea dagahan, ii oro unnumin jur dakkaviđe, baicce nuppe gežiid. Danne go dát Telemarksforsking dieđuid mielde oalle sihkkarit boahtá dagahit ahte guorahallama bohtosis lea dušše ráddjejuvvon árvu, de mii árvvoštallat dainna lágiin ahte mii loahpahit prošeavtta, dadjá dievasčoahkkinjođiheaddji Tom Sottinen.
Prošeavtta vuođđun lea eanetlohkomearkkašupmi áššis 056/22 Sámediggeválga - válgabarggu nannen.
Dievasčoahkkinjođihangoddi árvvoštallá eanet ulbmillažžan máhccat ruovttoluotta Sámedikki dievasčoahkkimii sierra áššiin mii guoská Sámedikki jienastuslogu guorahallamii.
– Dat sihkkarasttášii min mielas govddit politihkalaš meannudeami ja sajáiduhttima, dadjá dievasčoahkkinjođiheaddji.