Sámediggeráđđi lea dál sádden cealkámuša ođđa láhkaásahussii, ja ráđis leat vuordámušat konsultašuvnnaide dálkkádat- ja birasministariin,  Espen Barth Eidiin, árbevieruin masa lea stuora beroštupmi Guovdageainnu servodagas.

– Seamma deaŧalaš go ahte lodden šaddá bistevažžan, lea ahte loddemii mearriduvvojit njuolggadusat  maid báikkálaš bivdit dohkkehit. Jus láhkaásahus ii olat dohkkeheami báikkálaš geavaheddjiid gaskkas, de lea bahá ahte ii olat legitimitehta ge, dadjá sámediggeráđđi Maja Kristine Jåma (NSR).

Árbevirolaš máhttu vuođđun dán áššis
 

Sámediggeráđđi lea duhtavaš proseassain maid departemeanta lea čađahan barggus ásahit ođđa láhkaásahusa. Dálkkádat- ja birasdepartemeanta lea vuoruhan konsultašuvnnaid báikkálaš servviiguin, Boarriin ja  Sámi bivdo- ja meahcástan serviin, ja maiddái Sámedikkiin. Sii leat leamaš fárus lágideamen álbmotčoahkkima Guovdageainnus loddeme birra, ja Loddenlávdegotti guorahallan lea bidjon diehtovuođđun go leat bargan ođđa loddenortnegiin.  

– Sámediggeráđđái oaidná deaŧalažžan go árbevirolaš máhttu dohkkehuvvo ja vuoruhuvvo dássálaga dutkiid máhtuin áššis mat gusket sámi kulturdoaimmaide ja sámi kultuvrii, dadjá Jåma.

Bivdán don doloža rájes ja dehálaš seailluhit gelbbolašvuođa boahttevuhtii

Loddemis lea historjjálaš ja kultuvrralaš vuođđu doložis sámi johtalan ja bivdokultuvrras,  ja lodden sisttisdoallá sámi iešbirgejumi gitta dálá áigái. Sámedikki dievasčoahkkin lea čujuhan ahte  ekologalaš birgejupmi ferte bidjot vuođđun álo go galgá mearridit ođđa njuolggadusaid sámiid kulturdoaimmaide.  Sihke báikkálaš bivdiin ja serviin lea beroštupmi seailluhit ja bisuhit loddenáliid loddema várás. Muhto go mearrida ođđa láhkaásahusa, de ferte maiddái váldit vuohti ahte seailluheapmi  maid fátmmasta daid kultuvrralaš  beliid. Diet guokte beali guollaba oktii ja leaba sorjavaččat nubbi nuppis.

– Ođđa láhkaásahus viiddiduvvo ovddeš ásahusa ektui, nu ahte lodden šaddá kultuvrralaččat guoddevaš, ja dát sámi árbevierru joatkašuvvá, ovddemustá boahttevaš buolvvaide. Mis leat vuordámušat ahte konsultašuvnnat čađahuvvojit rehálaččat ja dainna ulbmiliin ahte mis olahit ovttaoaivilvuođa departemeanttain. Mis lea mihttun ahte ođđa láhkaásahus lea sajis buori áiggis ovdal go dán jagi lodden álggahuvvo, loahpaha sámediggeráđđi.

Jos háliidat jearahallat sámediggeráđi Maja Kristine Jåma, de leat dá oktavuođa dieđut tlf: +47 472 42 366  maja.kristine.jama@samediggi.no