Diimmá Sommerleskampánja statistihkka čájeha čielga beroštumi sámegielaide oasseváldiid bealis. Lohkkojuvvojedje 423 kapihttala davvisámegillii, 250 kapihttala lullisámegillii ja olles 616 kapihttala julevsámegillii.

– Mun lean ilus go mii sáhttit váikkuhit dasa ahte sámi oahppit geat servet áŋgiruššamii besset lohkat girjjálašvuođa iežaset gillii, ja mun ávžžuhan buohkaid searvat Sommerleskampánjii dán geasi, dadjá sámediggeráđđi Paul Bendikk Jåma (NSR).

Lohkankampánja ulbmil lea lohkat nu ollu go vejolaš kampánjaáigodagas ja čohkket čuoggáid. Oasseváldit sáhttet vuoitit sihke digitála trofeaid ja smávva vuoittuid maid sáhttá viežžat girjerádjosis.

Jagi 2022 rájes lea jahkásaš erenoamáščállojuvvon muitalus jorgaluvvon golmma sámegillii, Sámedikki doarjagiin.

Dán jagáš muitalusas, maid Mari Moen Holsve lea čállán, lea bajilčála «Váralaš skealbmasázut», lullisámegillii «Vaarege skïedtjesïevh», julevsámegillii «Bahágurigis sátso» ja dárogillii «Farlige skurkestreker». Lohkankampánja bistá borgemánu 31. beaivái 2026. Neahttabáikkis Sommerles.no sáhttet mánát registreret daid girjjiid maid lohket geasset, seammás go ožžot lohkanrávvagiid iežaset báikkálaš girjerádjosis.

Háliidatgo diehtit eanet Sommerles birra? Dás gávnnat visot maid dárbbašat diehtit Sommerleskampánja birra: https://altom.sommerles.no/ https://altom.sommerles.no/