Geassemánu 1. beaivvi álggahuvvo dán jagáš Sommerles.no-kampánja, mii bistá gitta borgemánu 31. beaivái. Sommerles.no lea bures lihkostuvvan máŋggaid jagiid, ja diibmá oasálaste badjel 164 000 máná. Kampánjja mihttu lea movttiidahttit mánáid lohkat nu olu go oba nagodit ge olles geasseluomu.

Dál besset riikka girjerádjosat ávvudit ja čalmmustahttit maid sámi mánáidgirjjálašvuođa skuvlamánáide lohkankampánjja oktavuođas.

– Lean ilus go sáhttit váikkuhit dasa ahte sámi oahppit geat leat mielde kampánjjas besset lohkat iežaset gillii, ja ahte sámi mánáidgirjjálašvuohta eanet čalmmustahttojuvvo buot skuvlaohppiide geat servet, dadjá sámediggeráđđi Maja Kristine Jåma (NSR).

Julevsámi guovllus Hápmiris šaddet Sommerles 2022 rahpandoalut buot 1.-7. luohkáide suohkanis geassemánu 1. beaivvi. Sommerles-girječálli Mari Moen Holvse boahtá rahpandoaluide Hamsunguovddážis Presteidsas Hápmiris.  Kampánjja rahpan ávvuduvvo jitnositlohkamiin julevsámegillii.

Sommerles.no dahká lohkama suohtasin!

• Sommerles.no lea digitála lohkankampánja neahttasiiddus Sommerles.no. Mánát ráhkadit profiilla, sisačállet buot maid lohket kampánjaáigodagas ja čogget čuoggáid juohke lohkkon siiddu ovddas.
• Čuoggáid lassin sáhttet mánát maid oažžut digitála vuoittuid ja bivnnuhis vuoittuid maid sáhttet girjerádjosis viežžat.
• Mánát besset lohkat muitalusa maid girječálli Mari Moen Holsve lea čállán erenoamážit kampánjja várás.
• Sommerles.no lea mánáide 1. -7. luohkkái ja bistá geassemánu 1.b. rájes borgemánu 31.b. rádjái.
• Vestfold ja Telemark fylkesbibliotek ja Snuti AS leat ovdánahttán Sommerles.

Gažaldagaid dahje jearahallama addá sámediggeráđđi Maja Kristine Jåma (NSR), +47 47 24 23 66, maja.kristine.jama@samediggi