Vang suohkanis gaskkustuvvo historjá Lucie Mortensdatter Kant birra. Vestre Slidres ges ođasmahttojit galbbat ja bisánanbáiki Rensennvatnet jávregáttis. Dá lei sámiid orrunbáiki duhát jagi áigi.
Sámediggeráđđi Runar Myrnes Balto (NSR) lea ilus go sámi kulturmuitoguovddážat šaddet čalmmusin ja dovddus.
– Lea dehálaš čájehit ahte Lulli-Norgga historjá maid guoská sámi historjái, dadjá Myrnes Balto.
Sámediggeráđđi Elisabeth Erke (Gb), gii oassálastá rahpandoaluin, lea erenoamáš ilus go Lucie muitalus čalmmustahttojuvvo.
– Álgoálbmotnissoniid historjá lea dávjá vajálduhtton, lohká Erke.
Vang
Čalmmustahttin Vangas lea čakčamánu 7. beaivvi dii. 11.30, Mjøsvang kafeas. Doppe šaddá almmuheapmi galbbain, sárdnit ja musihkka. Mannjel almmuheami olgun, joatkit prográmma Mjøsvang kafeas, gos maiddái guossohuvvo beaivebiepmu.
Lucie Mortensdatter Kant birra historjá álgá go son riegádii 1857:s Plassjeduoddaris. Doppe ledje boazosápmelaččat váttis dilis. Ollugat gildojuvvo geavaheamis sin dološ guohtuneatnamiid. Ollu suohkaniiguin šattai lobiheapme guođohit bohccuid. Muhtimat álge bargat guođoheaddjin Norgga boazosearvvis. Okta dain lei Lars Jonasson Myrås. Lars eamidiinnis Lucie bođiiga 1891:as jođi Vangii, gosa ásaiduvaiga guhkás meahccái Smådalenii. Lucie oaččui váttes eallinvuorbbi. Dán birra beasat eambbo gullat čalmmustahttimis.
Vestre Slidre
Čalmmustahttin Vestre Slidres lea čakčamánu 8. beaivvi dii. 11.00 Rensennvatnet jávregáttis. Dáppe maid šaddá almmuheapmi galbbain, sártnit ja musihkka, ja maiddái kulturmuittuid oahpisteapmi. Maŋŋil vuodjit Brennabuii, gos lea beaiveborran, logaldallan, musihkka ja sártnit.
Goahtesajit duođaštit ahte sápmelaččat leat orron Rensennas loahppa vikiŋgaáiggi rájes. Arkeologalaš goaivumat čájehit ahte sii botne sávzaullu ja bivde firpmiin. Lea maiddái gelddolaš ahte guovlu lea geavahuvvon ruovdebuvttadeapmái. Brennabuas beasat gullat eambbo sámiid johtingeainnuid birra daid lulli duottarguovlluin.
Rahpandoalut leat rabas buohkaide. Sisabeassan ja lunša lea nuvttá. Bures boahtin!
Prográmma goappašat beivviide
Eanet dieđut Vang gaskkustanprošeavtta birra
Eanet dieđut Vestre Slidre gaskkustanprošeavtta birra