– Sámediggeráđi mielas lea deaŧalaš oažžut diehtit maid sámi álbmot oaivvilda Duohtavuođa- ja soabahankommišuvnna raportta birra. Go raportta meannudeapmi lea biddjon dievasčoahkkimii njukčamánus, de min mielas lea ulbmillaš maŋidit gulaskuddanáigemeari golggotmánu 31. beaivái 2023, dadjá sámediggeráđđi Runar Myrnes Balto (NSR).  

Sámediggeráđis lea leamaš čoahkkin Stuorradikki Dárkkistan- ja konstitušuvdnalávdegottiin ja lea meannudan raportta ja proseassa dan oktavuođas. Ráđđi lea maiddái searvan ollu panelaságastallamiidda, gulahallančoahkkimiidda ja eará doaluide main raporta lea leamaš fáddán.  

– Sámediggeráđđi oaidná ahte lea stuorra beroštupmi raportii. Gulaskuddan ja dievasčoahkkima duohtavuođa- ja soabahankommišuvnna meannudeapmi, lea deaŧalaš ja dárbbašlaš go galgá hábmet sámi politihkalaš vuoruhemiid boahtteáigái. Danne mii erenoamážit deattuhit makkár doaibmabijuid berrešii loktet soabadanproseassas. Mii háliidit ahte sámi servodat searvá nu viidát go vejolaš, ja gulaskuddanáigemeari maŋideapmi addá juste dasa vejolašvuođa, dadjá sámediggeráđđi Balto.  

Sámediggeráđđi lágida digitála gulaskuddama Zoom:s golggotmánu 18. b. dii. 11:00. Institušuvnnaide, organisašuvnnaide ja servviide. Seamma beaivvi, dii. 15:00, lea digitála gulaskuddan ovttaskas olbmuide. Buohkat geat áigot buktit gulaskuddancealkámušaid dáin čoahkkimiin, fertejit dieđihit iežaset  gulaskuddamii. Dieđut dieđiheami birra bohtet Sámedikki neahttasiiddus ja Faceebookas maŋŋil. Juohke ásahus/olmmoš oažžu 10 minuhta sárdnunáiggi digitála gulaskuddančoahkkimis.   

Gulaskuddancealkámušaid sáhttá maiddái sáddet digitála skovi bokte Sámedikki neahttasiidduin. Lea maiddái vejolaš sáddet árvalusaid dábálaš poastta bokte Sámediggái.  

– Sámediggeráđđi muittuha maiddái ahte lea vejolaš ohcat doarjaga deaivvadanbáikkiide gos digaštallet Duohtavuođa- ja soabahankommišuvnna raportta sisdoalu. Lea várrejuvvon 1 miljon ruvdno dán ulbmilii, dadjá sámediggeráđđi Runar Myrnes Balto (NSR).

Ruđat leat juogaduvvon guovtti ohcanvuđot ortnegii; Doarjja kulturdoaimmaide ja ásahusovddideapmi.

– Ásahusat ja organisašuvnnat mat ožžot njuolggodoarjaga Sámedikki kulturbušeahtas fertejit ohcat ruđaid ásahusovddideami bokte. Buohkat sáhttet ohcat dán kulturdoaibmabidjoortnega bokte, loahpaha Balto.   

Eanet dieđuid das movt sáhttá searvat gulaskuddamii gávnnat dás: Gulaskuddan - Duohtavuođa- ja soabahankommišuvnna raporta.

Gulaskuddanáigemearri lea golggotmánu 31. beaivi 2023.