Bajit oasis oahppoplánas, mii maid gusto sámi skuvlii, čuožžu ahte «Sámi skuvla galgá láhčit dili nu ahte oahppit ožžot oahpahusa mas sámi árvvut ja sámegiella, sámi kultuvra ja servodateallin lea vuođđun.».

Sámediggi lea danne ásahan fágajoavkku mas lea viiddis fágalaš vásihus sámi matematihkas ja etnomatematihkas, mii oaččui bargun guorahallat sámi parallealla seammaárvosaš oahppoplána vuođu matematihkas. Dehálaš ulbmil dáinna bargguin lea láhčit diliid buori matematihkkaoahpahussii. Fágajoavku rávve ahte álggahuvvo bargu ovddidit sámi parallealla seammaárvosaš oahppoplána matematihkas.

Fágajoavkku jođiheaddji, professor emeritus Anne Birgitte Fyhn geige raportta sámediggeráđđái Mikkel Eskil Mikkelsenii gaskavahku cuoŋománu 24. beaivvi.

– Raporta čujuha máŋgga deaŧalaš beliide parallealla seammaárvosaš oahppoplánas matematihkas. Mii oaidnit ahte mii sáhttit oahppat olu dain vásáhusain maid earret eará álgoálbmogat Alaskas ja Aotearoas Ođđa Zealánddas leat dahkan sullasaš oahppoplánaiguin, ja mat sáhttet leat ávkkálaččat midjiide viidáset barggus. Dáinna raporttain leat mii lávken ovtta lávkki lagabui ollislaš sámi oahppoplánabuktosa, dadjá sámediggeráđđi Mikkel Eskil Mikkelsen (NSR).

Fágalašjoavku čállá ahte sámi parallealla seammaárvosaš oahppoplána matematihkas sáhttá váikkuhit ollislaš oainnu oažžumii matematihka birra, daningo maiddái fágas lea kultuvrralaš bealli mielde. Sii čájehit movt matematihka oahppoplána sáhttá nannet sámi ohppiid identitehta ja kulturgullevašvuođa. Dasa lassin sáhttá oahppoplána veahkehit ohppiid ovdánahttit sámegiela matematihkalaš fágagiellan.

– Mun háliidan giitit fágalaš joavkku buori ja vuđolaš barggu ovddas, ja mun illudan čuovvolit raportta rávvagiid, loahpaha sámediggeráđđi Mikkelsen.

Raporta geigejuvvo sámediggeráđđái cuoŋománu 24. b. dii. 14:00-15:00 Sámedikki girjerádjosis Kárášjogas. Dát streamejuvvo Sámedikki neahtta-TV:s. Sámediggeráđđi Mikkel Eskil Mikkelsen searvá dilálašvuhtii.

Don gávnnat raportta dáppe: Hvorfor det er nødvendig med en samisk parallell likeverdig læreplan i matematikk (PDF, 608 kB)