Dievasčoahkkinjođihangoddi Árvu/Sámediggi

Mohtorjohtolatláhka lei álggos plánejuvvon meannuduvvot Stuorradikkis geassemánu 19. beaivvi, muhto áigemearri lea ovddiduvvon geassemánu 9. beaivái. Geahččaleamit maŋidit meannudeami ii leat lihkostuvvan, go Stuoradikki energiija- ja biraslávdegoddi ii leat vástidan Sámedikki dievasčoahkkinjođiheaddji jearaldaga.

Sihkkarastin dihtii ahte Sámedikki dievasčoahkkin gieđahallá mohtorjohtolatlága ovdal go Stuorradiggi meannuda ášši, de mearridii Sámedikki dievasčoahkkinjođihangoddi čoahkkimis gaskavahku cuoŋománu 22. beaivvi lágidit liige digitála dievasčoahkkima miessemánu 19. beaivvi. 

– Ášši adnojuvvo prinsihpalaččat dehálažžan, ja lea mearrideaddji ahte Stuoradikki lávdegoddi oažžu vejolašvuođa vuđolaččat meannudit ášši ovdal Stuorradiggi loahpalaččat meannuda ášši, lohká dievasčoahkkinjođiheaddji Sandra Márjá West (NSR). 

Ášši meannuduvvo Sámedikki plána- ja finánsalávdegottis miessemánu 13. beaivvi, digitála čoahkkimis. Joavkočoahkkimat čađahuvvojit digitálalaččat miessemánu 12. beaivvi. Liige dievasčoahkkimis miessemánu 19. beaivvi leat guokte ášši meannudeapmái: Vuođđudeapmi ja Sámedikki cealkámuš Prop. 61 L (2025-2026) – Ođđa mohtorjohtolatláhka.

Dievasčoahkkinjođihangoddi lea maid mearridan ahte gokčet dárbbašlaš mátkegoluid joavkojođiheddjiid oassálastimii stuoradiggelávdegotti gulaskuddamii Stuorradikkis Oslos cuoŋománu 27. beaivvi. Loga eanet gulaskuddama birra Stuorradikki energiija- ja biraslávdegottis Stuoradikki neahttasiidduin

Sámedikki dábálaš dievasčoahkkin lágiduvvo geassemánu 15.-19. beivviid.