Maanagærjah-prošeakta lea lullisámi girjjálašvuođa prošeakta maid Trøndelága fylkkagirjerájus jođiha, ja man ulbmil lea seailluhit ja nannet lullisámi giela. Sii plánejit almmuhit sullii 16 girjji mánáide ja nuoraide dán jagi. Sámediggeráđđi juolluda 700 000 ruvnno doarjjan jorgalit girjjiid lullisámegillii. Lea maid áigeguovdil jorgalit eará sámegielaide gos lea lunddolaš. Fylkkagirjerájus ovttasbargá giellaguovddážiin Gïelem nastedh.

Paul Bendikk Jåma Árvu/Sámediggi

– Maanagærjah-prošeakta lea leamaš hui dehálaš dasa ahte oažžut eanet girjjálašvuođa lullisámegillii. Giellaovdáneapmái lea erenoamáš dehálaš ahte gávdno girjjálašvuohta olámuttos. Lullisámegielas lea erenoamáš dárbu jorgaluvvon girjjiide, go ain leat unnán lullisámegielat girječállit, dadjá sámediggeráđđi Paul Bendik Jåma (NSR). 

Son searvvai cuoŋománus máilmmi stuorámus mánáid- ja nuoraidgirjjálašvuođa meassuide Children's Book Fair 2026 Bolognas Itálias, gos sámi girjjálašvuohta čalmmustuvvui riikkaidgaskasaččat.

– Go beroštupmi lassána riikkaidgaskasaččat, de dat čájeha maiddái man deaŧalaš lea nannet sámi girjjálašvuođa buvttadeami ja olahahttivuođa ruovttus, dadjá Jåma.

Sámediggeráđđi juolluda maiddái guokte doarjaga Bárus SA lágádussii Guovdageainnus. Prošeakta Somá lávlut oažžu 445 000 ruvnno doarjaga ja galgá buvttihit sihke girjji, musihka ja musihkkavideoid mánáide. Lávlungirjjis galget leat QR-kodat mat mannet YouTubei, gos lávlagiid gávdná oktan teavsttaiguin. Lávlagat almmuhuvvojit maiddái Spotifyas. 

Nubbi prošeakta Bárus SA:s lea goalmmát girji ráiddus Mikká ja Áile birra; «Mikká ja Áile čorgeba juovllaide». Prošeakta oažžu 207 250 ruvnno doarjjan. Girji lea čállojuvvon davvisámegillii ja lea jurddašuvvon 3-7-jahkásaš mánáide. Nugo ovddit girjjit ráiddus, de lea maiddái dát interaktiiva, nu ahte mánát sáhttet aktiivvalaččat searvat muitalussii.

– Bárus SA lea daid maŋemus jagiid almmuhan máŋga mánáidgirjji mat leat bures vuostáiváldon sámi servodagas. Lávlun lea dehálaš oassi mánáid giellaovdáneamis. Lávlumiin mánát ohppet sihke ođđa sániid ja dadjanvugiid, ja dat doarju giellaoahppama. Danne mun illudan go dát almmuhuvvo, dadjá Jåma.

Solum Bokvennen AS Oslos oažžu 335 250 ruvnno doarjjan jorgalit mánáidgirjji «Oscar og eg: Alle plassene vi er» dárogielas davvisámegillii. Girji lea vuoitán Brage-bálkkašumi, ođđadárogiel mánáidgirjebálkkašumi, ja lei nominerejuvvon Davviriikkaid ráđi mánáid- ja nuoraidgirjjálašvuođa bálkkašupmái.

Tjihkkom Almmudahka Ájluovtas Hábmeris oažžu 158 250 ruvnno doarjjan jorgalit Moa Backe Åstot lyrihkalaš romána "Det är om dig jag skriver" julevsámegillii. Åstot lea sámi girječálli Ruoŧas gii čállá fáttáid birra mat gusket sámi kultuvrii ja servodahkii, main lea erenoamážit relevánsa nuoraide.

Bjarne Holst Galleri Nordkapp Sti Honesvágis oažžu 80 000 ruvnno doarjjan Bjarne Holst govvagirjji "Fuglen som mistet vingene" ođđa almmuheapmái. Girji almmuhuvvui vuohččan 1984:s, ja ođđa gáhppálat galgá speadjalastit Finnmárkku kultur- ja giellaguovlluid. Ulbmil lea ovddidit searvadahttima ja eastadit olggušteami, ja girji galgá dan dihte almmuhuvvot sihke dárogillii ja sámegillii.

Oppalaš geahčastat buot juolludemiin sámi girjjálašvuhtii dássážii 2026:s: