Skádja Studio lágádus, Magnus Vuolab, oažžu 153 000 ruvnno digitála almmuheapmái “Sami Music Goalmmát”, mii lea “Sami Music Vuosttaš”’ (2019) ja “Sámi Music Nubbi” (2021) čuovvoleapmi.

Magnus Vuolab lea bovden gávcci sámi artistta mielde dasa geat galget ovdanbuktit su komposišuvnnaid iešguđetge lágan musihkkašáŋŋeriin. Dasa lassin almmuhuvvojit guokte ođđa luođi. Almmuheames leat gávcci musihka ja guokte luođi, maid Vuolab lea komponeren ja masa lea ieš čállán teavsttaid.

Sámediggeráđđi addá maid oktiibuot 145 000 ruvnno guovtti gierdomátkedoibmii.

Sámi artistta Katarina Barruk oažžu doarjaga gierdomátkái Norggas, Ruoŧas, Suomas, Estteeatnamis ja Polenis. Joavku Arvvas, mas leaba Sara Marielle Gaup Beaska ja Steinas Raknes, oažžu doarjaga almmuhangierdomátkái Japanii.

– Lea stuora aktivitehta sámi musihkkamáilmmis, ja sámi artisttat mátkkoštit sihke Sámis ja olggobealde Sámi. Dasa lassin buvttaduvvojit musihkat iešguđet musihkkašáŋŋeriin. Mun jáhkán sihke luođi ja sámi musihka almmuheamit ja gierdomátkedoaimmat váikkuhit dasa ahte šaddá eambbo ipmárdus sihke ođđamállet ja árbevirolaš sámi musihkkii, dadjá sámediggeráđđi Maja Kristine Jåma (NSR).

Juolludeamit oktiibuot 298 000 ruvnno ovddas addojit Luohti ja sámi musihkka doarjjaortnega bokte.

Jus leat gažaldagat dahje háliidat jearahallat, váldde oktavuođa sámediggeráđiin Maja Kristine Jåma (NSR), mob. +47 472 42 366, maja.kristine.jama@samediggi.no