-Vuođđoealáhusat leat deaŧalaččat stuora osiide Sámis, ja guolásteapmi lea erenoamáš deaŧalaš ássiide rittus. Danne lea Sámediggeráđđi hui ilus go sáhttá doarjut nuorra guolásteaddji go áigu oastit iežas bivdofatnasa. Lea ollu mii čájeha ahte doarjja earret eará fanasháhkamii, lea váikkuhan positiiva ovdáneapmái sámi guovlluid guolástusain, dadjá sámediggepresideanta Silje Karine Muotka (NSR).

Sondre Elias Hansen orru Gáhppevuonas. Gáhppevuotna Davvenjárgga suohkanis gullá guovlluide mat leat siskkobealde Sámedikki ealáhusdoarjagiid doaibmaguovllu, ja danne lea ge vejolaš addit  doarjaga fitnodahkii.

Ohcamušas čállá Sondre Elias Hansen ahte son háliida ásaiduvvat Gáhppevutnii iežas bivdofatnasiin. Su bearrašis leat máŋggas guolásteaddjit. Dasa lassin lea Gáhppevuonas bivdoáŋgiris biras. Ohccis lea formálalaš gelbbolašvuohta ja hárjáneapmi guolásteaddjin.

250 000 ruvdnosaš doarjja juolluduvvo doarjjaortnegis Vuođđoealáhusat - Mariidna ealáhusat.