Miljovdnabealli sámi AI-áŋgiruššamii

Sámediggi lea NTEC Media AS:i juolludan 500 000 ruvnno prošektii Internia AI, mii lea ođđahutkanprošeakta man ulbmil lea ovddidit ođđa čovdosiid sámi fitnodagaid ja organisašuvnnaid bargoproseassaide.

Sametingspresident Silje Karine Muotka Ørjan Marakatt Bertelsen

Internia AI vuogádaga leat ráhkadan buoridan dihte sámi ealáhusdoaimmaid – sihke smávva ja gaskasturrosaš fitnodagaid digitála gelbbolašvuođa ja ekonomalaš ovdáneami. Vuogádat galgá álkidit ja beavttálmahttit moalkás proseassaid, lasihit buvttadeami ja beavttálmahttit mearrideami – dainna lágiin ahte geavaheaddjit eai dárbbat máhttit geavahit moalkás teknologiija. Prošeavttas maiddái lea ulbmil ásahit ođđa bargosajiid gos ovddidit goanstajierbme- ja dihtorvuđot vuogádagaid Sámis.

– Mii leat rámis go beassat doarjut Internia AI. Lea deaŧalaš ahte sámi ealáhusdoaimmat leat mielde teknologalaš ovdáneamis, vai mii fuolahit ahte dain leat gilvalannávccat, duddjot ođđa vejolašvuođaid ja nannet báikegottiid ođđa digitála čovdosiiguin, dadjá sámediggeráđđi Silje Karine Muotka (NSR).

NTEC Media ásaheaddji Odd Levi Paulsen lea Ájluovttas eret, sus lea nana fidnohutkanduogáš, ja lea bargan sátnegirjjiiguin NTEC Medias. Su fidnohutkanduogáš lea givrodahkan sihke prošektii ja ohcamuššii. Fitnodagas leat stuora áigumušat IT-ovdánahttima olis ja das lea ulbmil leat njunnošis goanstajierpmi ovdánahttimis.

NTEC Media lea ožžon loatnadáhkádusa Innovasjon Norges ja dan dihte lea ovdánahttinbarggu ruhtadeapmi realisttalaš. Sámedikki mielas lea deaŧalaš doarjut sámi fitnodagaid main lea áigumuš doaimmahit ovdánahttinbargguid.

– Šaddá miellagiddevaš oaidnit prošeavtta ovdáneami ja vejolašvuođaid maid dat mielddisbuktá árvoháhkamii, beavttálmahttimii ja bargosajiide Sámis, loahpaha Muotka.

Juogadanboalut