Ráhkis buohkat,

Mun háliidan Sámedikki ja sámi servodaga bealis vuosttažettiin cealkit Lemeha Edel:a lagamuččaide dearvvuođaid dán morašdilis. Mii muittašat Edel Hætta Eriksen mearkkašahtti ja erenoamáš nissonolmmožiin, gii olles eallinagistis áŋgirušai ja beroštii sámi gielas, oahpahusas ja servodagas. Son beroštii maiddái sámepolitihkas ja lea duođai bálvalan sámi álbmoga su doaimmaid bokte.

Áŋgirvuođain lea son nannen sámi oahpahusa, sámegiel-árvvu lokten ja áŋgirušai sajádit sámegiela oahpahusgiellan maŋŋel dáruiduhttima. Sutnje lei maid dehálaš ahte oahpahushálddašeapmi ja eará ásahusat ledje sámis, ja dasa lea son maid váikkuhan.

Edel beroštii sákka sámi mánáid dilis. Son lei oahpaheaddji badjel 30 jagi ja barggai maid rektoriin máŋggaid jagiid. Su vuolggasadji lei álo sámi mánná ja sámi mánáid dárbbut ja rievttit. Son lei maiddái Sámi Oahpahusráđi vuosttaš direktevrá, ja lea láidestan nu čehpet buot dáid doaimmaid. Ollugat leat maiddái deattuhan man fiinnalunddot olmmoš son lei, ja mo son láđisvuođain cuigii dan mii ii lean vuogas.

Háliidan váimmustan deattuhit giitevašvuođa buot su dáguid ovddas, ja dieđan ahte son dagai nu, ráhkisvuođain iežas servodahkii. Dál lea son vádjolan, midjiide báhcet buori muittut sus gii lei erenoamáš servodatberošteaddji, ovdagovvan ja láidesteaddjiin ollugiidda – son gii iežas čehpodagain lei mielde váikkuheame ja rievdadeame min servodaga buorebun. Edela eallingeardi lea midjiide buohkaide inspirašuvdnan joatkit bargat dan buoremusa sámi mánáid, giela ja oahpahusa ovddas.

Šerres bálggesčuovga lea dál vádjolan ja viššalis gieđat besset dál vuoiŋŋastit. Mii muittašat du, Lemeha Edel rohkki.

Ráfi lehkos su muitun.

Lágamuččaid dáhtu mielde, addá Sámediggi ruhtasupmi Guovdageainnu buhcciid- ja boarrásiidruktui ovdalii go rásiid.