Hans Majestet Kong Harald V
Kimm Saatvedt, Det kongelige hoff
Sámediggepresideanttat, gudnejahtton sámediggeáirasat, ráhkis guossit,
Bealnjealját vahku dassái oaččuimet morašlaš dieđu ahte Gonagas Harald V lei vádjolan.
Gonagas Harald finai máŋgii min guossis Sámedikkis. Son oassálasttii Sámedikki rahpamis vuosttas háve 1993:s, ja maŋimuš háve diibmá golggotmánus. Odne lea ártet jurddašit ahte son čuoččui justa dán sárdnestuolus.
Gonagas Harald lei sápmelaččaid lágaš verdde. Gonagas loktii sápmelaččaid sajádaga Norggas ja nannii Sámedikki mearkkašumi. Son viiddidii Norgga almmolašvuođa ja bovdii sápmelaččaid iežas beavdái.
Máŋgii lei min gonagas ovdaleappos earáid. Ollu sápmelaččat muitet Gonagas Haralda sártni man doalai 1997:s, go ánui ándagassii stáhta dáruiduhttinpolitihkas. 2005:s ánui son ándagassii Divttasvuona rádjáofelaččain go sii ledje sivahallon leat riikabeahttit soađi maŋŋá. Gonagas áddii ahte historjjálaš boasttuvuođat ledje dáhpáhuvvan ja válljii ieš dahkat dan maid sáhtii njulgen dihte – dálkkodeami dihte. Doavttir Ester Fjellheim lea gohčodan Gonagas Haralda psykologan, go son válddii vuostá sámi álbmoga bákčasa iežas sániiguin.
Gonagas Harald ii láven kruvnnain vázzit. Muhto 1969 cokkai son šávkká go soai Dronnet Sonjain galledeigga Guovdageainnu, go leigga easkanáitalan kruvdnaprinsapárra. Govat sudnos vilges beaskkaiguin leat šaddan ikonalažžan. Go cokkaiga sámi čiŋaid de soai čalmmustahtiiga ja gudnejahtiiga sámi kultuvrra.
Mii giitit Gonagas Harald-rohki go čađat oinnii min, go guldalii min, erenomážit daid háviid go orui nu ahte ii oktage eará dáhkan dan.
Prinsesse Astrid, fru Ferner
Ola Vatn, Det kongelige hoff
Beannot vahkku dassái bođii surgadis diehtu ahte Prinseassa Astrid lei vádjolan, guokte vahkku maŋŋá iežas viellja.
Prinseassa Astrid doaimmai máŋggaid jagiid Norgga vuosttašroavván, áhčis Gonagas Olav V doarjjan. Prinseassa Astrid guovttos Gonagas Olavain finaiga Finnmárkkus 1959:s. Skiippaguras gárttai gonagasráidu bissánit go unna sámenieida lei čuožžilan gasku geainnu geigen dihte gonagassii rásiid. Dát nieida lei 7-jahkásaš Inger Helander Länsman. Diekkár lágan olmmošdeaivvademiid vásihii prinseassa máŋgii guhkes eallimis gonagasviesu barggus. Ja nu lei son oassin gonagasviesus mii lea lahkonišgoahtán min, mii lea fitnan min guossis ja bovden min ovddasteddjiid šlohttii.
Prinseassa Astrid lea viiddidan nissonolbmuid rolla gonagasviesus ja Norgga servvodagas. Son lea dáistalan ráhkisvuođa ovdii ja iežas bearašeallima ovdii. Son lea maid gáibidan vejolašvuođa ovttastahttit bargoeallima ja bearašeallima. Prinseassa manai ieš sosiálakantuvrii Majorstuas Oslos ja bivddii mánáidgárdesaji iežas gándii – go sus han lei bargu man áiggui čađahit.
Prinseassa gearggai bálvalit njeallje gonagasa ja barggai Gonagasviesu ovddas gitta lohppii iežas eallimis. Son lei árjjalaš, buorredáhtolaš ja beroštii ollu olbmuin geaiguin son deaivvadii.
Ráfi lehkos Gonagas Harald V muitui.
Ráfi lehkos Prinseassa Astrida muitui.
Mii doallat dál ovtta minuhta jaskatvuođa Gonagas Haralda ja Prinseassa Astrida gudnin.