Tom Sottinen Árvu/Sametinget

– Sámediggi ferte leat ožžon válgalisttaid áigemearrái. Áigemearri ii maŋiduvvo, dadjá dievasčoahkkinjođiheaddji Tom Sottinen.

Vuolláičállojuvvon listaevttohusaid sáhttá sáddet Sámediggái juogo elektrovnnalaččat, reivve bokte boasttas, dahje sáhttá maiddái buktit listta persovnnalaččat muhtin Sámedikki kantuvrii, juogo Kárášjogas, Vuonnabađas, Guovdageainnus, Gáivuonas, Romssas, Skániin, Ájluovttas, Aarbortes dahje Snoases.

Jus vuolláičállon listaevttohusat sáddejuvvojit elektrovnnalaččat, de ferte geavahit Sámedikki neahttasiidduid e-dialogačovdosa; E-dialoga (gáibida sisaloggema). Ferte maiddái čielgasit boahtit ovdán ahte listtaevttohus guoská sámediggeválggaide. Jus áigu searvat sámediggeválggaide, de ferte leat registrerejuvvon Sámedikki jienastuslogus.

– Sámediggi ávžžuha buohkaid geat áigot cegget válgalisttaid čuovvut njuolggadusaid garvin dihte ahte listaevttohusat hilgojuvvojit, dadjá Sottinen.

Sámediggeválggat dollojuvvojit seamma beaivvi go stuoradiggeválggat. 2025:s lea válgabeaivi čakčamánu 8. beaivvi.

Listaevttohusas ferte leat:

• Bajilčála mas oidno bellodaga dahje joavkku namma mii lea ovddidan evttohusa, ja guđe válgabiirii dat gullá.
• Jos listaevttohus boahtá sámepolitihkalaš organisašuvnnas mii lea registrerejuvvon Sámedikkis, galgá bajilčállosis leat registrerejuvvon namma. Bajilčállosa maid muđui ii galgga sáhttit malssidit eará registrerejuvvon sámepolitihkalaš organisašuvnnain, registrerejuvvon politihkalaš bellodagain, dahje eará listaevttohusa bajilčállosiin válgabiirres.
• Gáibiduvvo ahte lea unnimusat 40 % sohkabealjuohku válgalisttas. 
• Buot listaevttohusain galget lea unnimusat ovcci válgadohkálaš evttohasa nama biires. 
• Biiriin main leat gaskal guokte ja njeallje mandáhta, galget bidjat ovcci evttohasa nama listaevttohussii. 
• Jos biires leat 5 dahje eanet mandáhta, de sáhttá evttohasaid logu oktiibuot duppalastit. 
• Olbmuin geat leat válgalisttas, galgá leat ovdanamma, goargu ja riegádanjahki. 
• Virgi dahje ássanbáiki galgá biddjojuvvot buot evttohasaide jos lea dárbu earuhit olbmuid nubbi nuppis.
• Válgalisttas eai galgga leat seamma evttohasat mat leat eará válgalisttain. 
• Oktasaš listtain sáhttá dieđihit ovttaskas evttohasa gullevašvuođa joavkkuide mat leat evttohusa duogábealde.
• Organisašuvnnaid listaevttohusa, mat eai leat registrerejuvvon sámepolitihkalaš organisašuvdnan Sámedikki registaris, galget leat vuolláičállán unnimusat 30 olbmo geat leat Sámedikki válgajienastuslogus. Dat fertejit leat registrerejuvvon dan válgabiires gos lista biddjojuvvo. 
• Registrerejuvvon sámepolitihkalaš organisašuvnnaid ektui lea doarvái ahte listaevttohusa vuolláičállet unnimusat guokte stivralahtu válgabiire organisašuvnna báikkálaš ossodagas dahje guovttis organisašuvnna doaibmaorgánas.
• Listaevttohussii ferte biddjojuvvot gii lea luohttámušolmmoš ja várrelahttu evttohusa biddjiid gaskkas.
• Listaevttohusa mielddusin galgá čuovvut geahčastat mas leat evttohasaid ja evttoheddjiid riegádandáhton ja poastačujuhus. Listaevttohus sáddejuvvo Sámediggái.

Geahča muđui paragráfa 28 ja paragráfa 29 sámediggeválggaid láhkaásahusas.

Loga sámediggeválggaid láhkaásahusa

Válgalistamálaid sáhttá viežžat dás: Válgalisttat - Sámediggi