– Sávan lihku Kárášjoga álbmogii, mii lea čoahkkanan ja ovttas vuoitán meahcceduopmostuolus. Dán vuođul lea duopmu historjjálaš. Sámediggi áigu dárkilit geahčadit duomu, dadjá sámediggepresideanta Silje Karine Muotka.
 
Sámediggepresideanttas lea dattetge čielga ávžžuhus Finnmárkkuopmodahkii (FeFo).
 
– Duopmu lea oalle čielggas, ja čuovvu Finnmárkolága áigumušaid. Finnmárkkuopmodaga stivra sáhttá dál válljet doahttalit duomu. De beasašeimmet bargagoahtit dainna movt sáhttit láhčit dili nu ahte Kárášjoga álbmot ovttas sáhttá hálddašit iežas vuoigatvuođaid buoremus lági mielde, dadjá presideanta Muotka.
 
Sámedikki vuolggasadji lea ahte duopmu, beroškeahttá loahpalaš bohtosis, ii iešalddes váikkut njuolga FeFo:i.
 
– Ii leat amas ahte Norgga meahcit hálddašuvvojit ovdamearkka dihtii giliid oktasaš geavahusrivttiid vuođul, nu ahte Kárášjoga eretčuoldin Finnmárkkuopmodagas ii leat rievtti mielde nu dramáhtalaš. Dat eatnamat mat Finnmárkkus vel leat, leat hui viidát, ja miehtá Finnmárkku leat orron ja orrot sápmelaččat, nu ahte sihke Finnmárkoláhka ja FeFo leat oadjebasat, dadjá sámediggepresideanta.

Sámediggeráđđi Runar Myrnes Balto (NSR) lea doaibmi sámediggepresideanta, ja mediat sáhttet suinna váldit njuolgga oktavuođa, tel. 977 73778, runar.myrnes.balto@samediggi.no