Dat dahká 450 000 ruvnno 2024:s, ja čuovvuluvvo oktiibuot 900 000 ruvnnuin 2025-bušeahtas. 

– Sámi museat šaddet hui deaŧalaččat Duohtavuođa- ja soabahankommišuvnna raportta čuovvoleamis, erenoamážit dáruiduhttinhistorjjá gaskkustanbarggus. Dát lea vuosttaš veahkki mii lokte sin kapasitehta, dadjá sámediggeráđđi Runar Myrnes Balto (NSR), geas lea ovddasvástádus bušeahtas.

Sámi museat leat guhká ožžon unnán ruhtadeami, go buohtastahttá sullasaš dáčča museaiguin. Duogáš lea ahte sámi museaid leat vajálduhttán go museasuorggi leat našuvnnalaččat lokten, danne go sámi museat ožžot doaibmadoarjaga Sámedikkis.

– Mun lean hui ilus go mii dál oažžut áigái vuosttaš loktema sámi museaide, vaikko mii ain vuordit ráđđehusa sámi kulturloktema. Sámi museain lea deaŧalaš doaibma sámi servodagas. Ollu báikkiin leat museat maiddái deaŧaleamos sámi deaivvadanbáikkit. Danin mii dál vuoruhit dán, dadjá Maja Kristine Jåma (NSR), sámediggeráđđi geas lea ovddasvástádus kultuvrii.

450 000 ruvnno fásta lassáneami lassin juolluduvvojit museaide máŋga ovttagearddejuolludeami. Árran julevsámi guovddáš oažžu 300 000 ruvnno bargui Hans Ragnar Mathisen dáiddačoakkáldagain. Saemien Sijte oažžu 700 000 ruvnno váldočájáhusa gárvvisteapmái. Várdobáiki oažžu 100 000 ruvnnu iežas čájáhussii "Hillá - min muitalusak". RiddoDuottarMuseat (RDM) oažžu 550 000 ruvnno ráhkkanahttit ja plánet ođđa museavistti Kárášjohkii.

– RDM ja Deanu ja Várjjat Museasiida leat ovttastumit main goappašagain leat máŋga musea, ja danne dain lea stuorát dárbu go dain eará museain. Daid duohta nannen čuovvuluvvo boahttevaš jagiid, erenoamážit dan dihte go galget huksejuvvot ođđa musealanjat sihke Kárášjoga museai ja Saviomuseai Mátta-Várjjagis, dadjá Jåma.