Sámediggi lea 2022 skábmamánu rájes ožžon olu sisačálihanohcamušaid. Sámediggái lea dehálaš ahte lea buorre áššemeannudeapmi ja ahte buohkat geat háliidit ja geain lea riekti dasa, besset jienastit sámediggeválggain. Lassáneami geažil lea maid Sámediggi nannen bagadallandoaimma.
Jus áiggut jienastit sámediggeválggain, de fertet leat dieđihuvvon Sámedikki jienastuslohkui. Buohkat geat háliidit, sáhttet deavdit skovi mas dáhttot čálihuvvot válgajienastuslohkui. Vai šaddá nu buorre áššemeannudeapmi go vejolaš, de lea ovdamunni jus ohcci bidjá duođaštusa vel mielde ahte deavdá eavttuid.
Loga eanet eavttuid birra ja dieđit iežat Sámedikki válgajienastuslohkui
Don sáhtát dákkár dieđuid gávdnat álbmotregistaris, girkogirjjiin, sohkagirjjiin dahje giligirjjiin. Lea maid vejolaš ohcat dieđuid digitála vuorkkáin mat leat interneahtas.
Dáppe sáhtát ohcat dieđuid:
Digitálaarkiiva
Oza álbmotlohkamiin jagiin 1865, 1875, 1900 ja 1910 - Registreringssentral for historiske data
Jus dus leat sámi máttut eará riikkain, sáhtát dan riika stádavuorkkáin viežžat dieđuid.
Sámediggi dárkkista dieđuid maid attát, ja jus du ávžžuhus dohkkehuvvo, oaččot don reivve dan birra. Sámediggi árvvoštallá leat golbma mánu áššemeannudanáiggi ávžžuhusaide.
Jus dus leat gažaldagat, dahje dárbbašat bagadallama, sáhtát váldit oktavuođa Sámedikkiin, tlf. 78 47 40 00.