Sámediggi lea 2026;as logi prošektii juolludan doarjaga Prošeakta ja ovddidanbargu mánáidgárddis doarjjaortnega bokte. Ortnet lea hábmejuvvon sámi mánáidgárddiide, mánáidgárddiide main lea sámi ossodat, ja eará mánáidgárddiide maidda lea juolluduvvon doarjja sámegieloahpahusa váste. Das lea mihttomearrin dáhkidit doaibmabijuid sámi árbevirolašmáhtu váste mánáidgárddiin ja váikkuhit ahte eambbo mánát besse ovddidit iežaset sámi identitehta.
– Sámediggi illuda go beassá doarjut mánáidgárddiid mat dihtomielalaččat barget sámi giela ja kultuvrra ovddidemiin mánáidgárdeárgabeaivvis. Mánáidgárdi lea okta dain deháleamos arenain nuoramusaid giela, identitehta ja kultuvrra nannema váste, dadjá sámediggeráđđi Ann-Elise Finbog
Doaibmi sámi giella ja árbevirolašmáhttu
Dán jagi juolludeamit fátmmastit sihke giellaovddidanprošeavttaid ja doaibmabijuid mat galget váikkuhit sámi árbevirolašmáhtu geavaheapmái mánáidgárddiin. Prošeavttat sisttisdollet sihke sámegiela ealaskáhttemis ja sámegielat máhttoolbmo ávkkástallamis, sámi pedagogalaš prinsihpaid váste bargguide ja buolvvaid gaskka gelbbolašvuođasirdimii.
– Lea hui movttiidahtti go lea nu stuora valljivuohta prošeavttain mat ožžot doarjaga. Mánáidgárddiin leat iešguđet vugiid movt nannet sámi giela, kultuvrra ja árbevirolašmáhtu, ja čájehit movt sámi geahččanguovlu sáhttá lunddolaš oassin mánáidgárdeárgabeaivvis, dadjá Finbog.
Okta doarjjavuostáiváldiin lea Badjemánáid beaiveruoktu SA prošeakta Árbevirolaš máhttu ja birgejupmi – Sámi árbevirolašmáhttu jahkejuvlla bokte. Prošeavtta mihttun lea nannet mánáid giela, identitehta ja kulturipmárdusa sámi árbevirolašmáhtu, luondduipmárdusa ja birgejumi bokte.
Giellavealgu AS lea ožžon doarjaga Giella, lávlun ja stoahkan prošektii. Das lea mihttun nannet mánáid giellariggodaga, -ipmárdusa ja oadjebasvuođa giela geavaheami stoahkama, lávluma ja luođi bokte.
Geavatlaš sámi pedagogalaš prinsihpat prošeakta Suaja maanagïertes lea maid ožžon doarjaga. Prošeakta galgá nannet bargiid sámi pedagogihkka gelbbolašvuođa ja árbevirolašmáhtu, ja ovddidit oktasaš ipmárdusa movt sámi pedagogalaš prinsihpat galget leat vuođđun mánáidgárddi doaimmas.
Ođđa ohcanvuorru 2027;as
2027 ođđajagimánus rahppasa ođđa ohcanvuorru. Boahtte jagi rievdá doarjjaortnegis namma, ja šaddá Doarjja sámi árbevirolaš doaimmaide mánáidgárddiin. Ortnet boahtá leat sámi mánaidgárddiid, mánáidgárddiid main sámi ossodat, ja mánáidgárdeeaiggádiid geat háliidit ásahit ođđa sámi mánáidgárdefálaldagaid váste.
– Mii sávvat ahte ollu mánáidgárddit ohcet. Giela, máhtu ja árbevieruid juogadit nuoramusaiguin lea hirbmat árvvolaš. Dán ortnega bokte háliida Sámediggi váikkuhit ahte eambbo mánát besset deaivat ja geavahit sámi giela ja árbevirolašmáhtu árgabeaivvis, dadjá Finbog.
Dán jagi juolludeamit