Ortnega ulbmil lea váikkuhit buoret dearvvašvuhtii ja eanet ovttaárvosaš bálvalusaide sámi álbmogii. Doaimmat maidda lea addojuvvon doarjja, galget bargat dainna ahte nannet álbmotdearvvašvuođabarggu, psyhkalaš dearvvašvuođa, morašdoarjaga ja fágaovdánahttima sámi servodagain.
Ann-Elise Finbog
Árvu/Sámediggi
– Prošeavttat mat leat ožžon doarjaga leat iešguđetláganat, muhto dain lea dat oktasaš mihttomearri, ahte nannet eallinkvalitehta, searvevuođa ja dearvvašvuođa sámi servodagain. Dat leatge dehálaš eavttut vai olbmos šattašii buorre eallinkvalitehta. Sámedikki mielas lea dehálaš doarjut áŋgiruššamiid mat sihke eastadit hástalusaid bohciideamis ja mat huksejit oadjebas ja fátmmasteaddji arenaid olbmuide iešguđet agiin ja eallindiliin, dadjá sámediggeráđđi Ann-Elise Finbog.
Dát ožžot doarjaga:
Kievra AS: 235 000 ruvdno ásahit fierpmádaga sámi álbmotdearvvašvuođa várás riikkarájáid rastá Sámis. Fierpmádat galgá láhčit dili ovttasbargui ja gelbbolašvuođa juogadeapmái aktevrraid gaskkas mat barget álbmotdearvvašvuođain, ja fierpmádat galgá leat mielde ovddideame doaimmaid sámi gielaid, kultuvrra ja servodatdiliid vuođul.
Det hjelper, organisašuvdna geavaheddjiid ja sin lagamusaid váste: 183 000 ruvdno ovddidit vuosttašceahkkefálaldaga sidjiide geat bártidit gárrenmirkogeavahemiin ja psyhkalaš dearvvašvuođain, ja sin lagamusaide, Guovdageainnus. Prošeakta galgá váikkuhit eanet sosiála oassálastimii, doarjjafidnemii ja buoret ovttasdoaibmamii eaktodáhtolaš ja almmolaš bálvalusaid gaskkas.
Leve Finnmark fylkeslag: 100 000 ruvdno ain ovddidit doarjjafálaldaga sidjiide geat leat massán lagasolbmo iešsorbmemii ja nannet organisašuvnna doaimma Finnmárkkus. Prošeakta galgá bargat dan ovdii ahte oažžut eanet čoahkkananbáikkiid ja searvevuođa olbmuide geain lea lossa moraš guoddit.
Sámi Psykologasearvi: 15 000 ruvdno fágabeaivái, jahkečoahkkimii ja fágaseminárii 2026:s. Lágideapmi čohkkii miellahtuid ja fágačehpiid miehtá Sámi. Seminára fáddá lei boazodoalu mearkkašupmi psyhkalaš dearvvašvuhtii ja vuoiŋŋalašvuhtii.