2026 borgemánu ja čakčamánu lea Sámediggi juolludan oktiibuot 1 603 000 ruvnno čieža iešguđet prošektii. Prošeavttaid ulbmil lea ovddidit mátkeealáhusa, ođđa vásáhusfálaldagaid ja buktagiid, ja gaskkustit kulturhistorjjá. Oktasaš dáin prošeavttain lea ahte galget lasihit doaimmaid, árvohuksema ja ealáhusovdáneami sámi guovlluin.
Karlsøy Reiselivsforening oažžu 400 000 ruvnno prošektii “Top of Tromsø”. Buoret oinnolašvuođa, márkandili ja ovttasbarggu bokte báikkálaš aktevrraiguin, háliidit sii ovddidit Gálssá bivnnuhis birrajagi mátkkoštanbáikin ja áŋgiruššat erenoamážit čakča- ja dálveturismii, báikkálaš borramuššii ja kultur- ja meahccevuđot vásáhusaide.
– Karlsøy Reiselivsforening áigumuš lea čohkket ja nannet guovllu mátkeealáhusa. Lea hui buorre go háliidit dahkat Gálssá vel eanet geasuheaddji báikin birra jagi, dadjá sámediggeráđđi Paul Bendikk Jåma (NSR).
Dalut AS oažžu 144 000 ruvnno oastit bargoreaidduid maiguin ráhkada elemeantalávuid maid lea álki cegget, main lea alla kvalitehta ja maid heive atnit birrajagi sihke boazodoalus, mátkeealáhusain, skuvllain ja mánáidgárddiin.
Kongshus Invest AS oažžu 300 000 ruvnno ovddidit stašuvnna mariidna ealáhusa váste. Prošeavtta ulbmil lea ásahit doaibmi ja boahtteáiggediđolaš stašuvnna mii lea ávkin viidáset doibmii, báikkálaš árvohuksemii ja doaimmaide guolásteamis.
Nigomáhtte AS oažžu 225 000 ruvnno prošektii «Spider-rigg» mas ulbmil lea ovddidit gárdebargobuktagiid. Prošeavtta ulbmil lea ráhkadit hydraulalaš gárddi maid sáhttá sirddašit.
– Dá lea miellagiddevaš ovddidanprošeakta mii váldá vuođu ealáhusa praktihkalaš dárbbuin. Innovašuvnnat ja buvttaovddideamit mat beavttálmahttet bargguid ja buktet ođđa čovdosiid leat dehálaččat go galgá nannet báikkálaš árvohuksema ja barggahusa, dadjá Jåma.
Sandland Brygge AS oažžu 355 000 ruvnno cegget stuora lávu ođđa vásáhusarenan Sandland Brygges. Fitnodat háliida nannet daid fálaldagaid mat sis juo leat fanasláigoheami, mearrabivddu, idjadeami, meahccevuđot doaimmaid ja guossoheami dáfus, ja maiddái ráhkadit saji sosiála vásáhusaid, čoahkkanemiid ja borramuša váste árrangáddeguoras.
Holmen AS oažžu 120 000 ruvnno ovdaprošektii man ulbmil lea geahččalit gaskkustankonseaptta ivguheastta birra. Prošeavttain háliida fitnodat ovddidit vásáhusaid ja gaskkusteami mat oainnusmahttet ivguheastta mearkkašumi sámi ja davvinorgalaš historjjás, earret eará movt heasttaid leat atnán dállodoalus, eanadoalus ja diŋggaid fievrredeami oktavuođas.
Vangen Aerial oažžu 59 000 ruvnno ovddidit fitnolaš dronebálvalusa Gáivuona suohkanis, ja dainna lágiin váikkuhit ođđahutkamii ja ovdáneapmái guovllus.
– Lea buorre oaidnit fitnodagaid mat áŋgiruššet ovdánahttimii ja hutket ođđa vejolašvuođaid iežaset guovlluin. Prošeavttat mat ožžot doarjaga leat iešguđetláganat, muhto dain lea oktasaš dat, ahte dat ovddidit doaimmaid ja huksejit báikkálaš máhtu ja vuođu buoret árvohuksemii iežaset guovlluin, loahpaha sámediggeráđđi Jåma.
Doarjjavuostáiváldit: