Bargu galgá sihkkarastit ahte Sámedikki stivrejupmi, bearráigeahčču ja rollaáddejupmi nagoda dustet dađistaga stuorát ovddasvástádusa, gáibáduslassáneami ja eanet kompleaksa bargguid.
Prošeakta lea ožžon nama "Stivrejumi nannen".
– Sámediggi lea sakka sturron sihke ovddasvástádusaid, bargguid ja servvodaga vuordámušaid ektui. De fertejit hálddašanvuogádagat, siskkáldas dárkkisteapmi ja rollačielggadeamit maiddái ovddiduvvot daid ovddasvástádusaid mielde maid mii hálddašit. Mii galgat ovttas hukset gievrrat, stargaset ja boahtteáiggediđolaš Sámedikki, dadjá sámediggepresideanta Silje Karine Muotka (NSR).
Prošeakta mielddisbuktá ollislaš guorahallama fápmudusain, delegašuvnnain, raporterengeainnuin, siskkáldas dárkkisteamis ja riskastivremis. Mihttun lea sihkkarastit čielgaseabbo ovddasvástádusa, buoret dokumentašuvnna ja vuogádagaid kvalitehta ja čuovvoleami váste mat bohtet ávkin buot dásiide Sámedikkis, sihke politihkalaš ja hálddahuslaš.
– Mis galget leat vuogádagat mat girdet dárkkisteami, deattu ja mohkkáivuođa. Galgá leat čielggas geas lea ovddasvástádus mas, movt mearrádusat dahkkojuvvojit ja movt spiehkasteamit meannuduvvojit. Dát lea dárbbašlaš lokten nannen dihte sihke organisašuvnna ja luohttámuša Sámediggái ásahussan, dadjá Muotka.
Siskkáldas prošeaktajoavku galgá čađahit barggu ovttas olggobeale áššedovdiiguin. Sámedikki dievasčoahkkin ja álbmot ožžot dieđuid dađistaga ráđi dieđáhusa, joavkojođiheddjiid čoahkkimiid ja jahkedieđáhusa bokte.
Reviderejuvvon bušeahtas evttoha sámediggeráđđi nannet barggu vel eambbo. Evttohuvvo 500 000 ruvdnosaš lassijuolludus stivrejumi nannema bargui ja olgguldas, sorjjasmeahttun dieđihankanála ásaheapmái. Dieđihankanála galgá maid fátmmastit bajimus jođiheddjiid. Sámediggeráđđi evttoha maiddái ahte Sámedikki bearráigeahččanlávdegoddi nannejuvvo 750 000 ruvnnuin vai sáhttá čađahit olgguldas guorahallama das movt Sámediggi lea gieđahallan dan váttis dilálašvuođa ovddeš sámediggeráđi Mikkel Eskil Mikkelsena birra.
– Go ovddasvástádus stuorru, de ferte maiddái organisašuvdna ovdánit. Sámediggi galgá leat nanu, ámmátlaš ja jáhkehahtti ásahus, mas leat vuogádagat mat duhtadit boahtteáiggi dárbbuid stivrema, rabasvuođa, ja ovddasvástádusa ektui, dadjá Muotka.
Jearahallama addá dahje vástida gažaldagaide politihkalaš ráđđeaddi Håkon Mudenia (NSR), tlf. +47 979 50 115, hakon.mudenia@samediggi.no