UNESCO dieđuid mielde máilmmis leat gaskal 6000 ja 7000 giela. 96 proseantta gielain hupmet dušše golbma proseantta hubmiin. Ollu gielat jávket go eai geavahuvvo, ja máilmmiviidosaš digitaliseren maiddái čuohcá máilmmi álgoálbmotgielaide.
Sihke Sámediggi ja Gielda- ja guovlodepartemeanta aktiivvalaččat servet logijagibargui.
– Mii háliidit dán atnit dán logijagi vejolašvuohtan bargat eamiálbmotgielaiguin sihke nationálalaččat ja riikkaidgaskasaččat. Earret eará mii háliidit bargat vejolašvuođa ovdii atnit sámegiela giehtatelefovnnain ja iešguđet digitála lávddiin, dadjá Sigbjørn Gjelsvik (Gb).
– Sápmelaččat ovttasbarget viidát riikkarájiid rastá ja mii bargat sámegielaid nannemiin beaivválaččat máŋgga dásis. Mu mihttu lea oažžut áigái nationála sámi giellaloktema mas leat dihtomielalaš vuoruheamit, ja ahte min válljejumiin leat positiivvalaš synergiijat maiddái eará álgoálbmotgielaide, dadjá sámediggeráđđi Mikkel Eskil Mikkelsen (NSR).
Sámediggi ja departemeanta leat ovttas ásahan nationála ovttasbargoforuma mii galgá koordineret logijagi barggu Norggas. Das leat earret eará sámi nuoraidorganisašuvdna Noereh, Sámi allaskuvla, Davvi universitehta ja Romssa universitehta - Norgga árktalaš universitehta, Máhttodepartemeanta, Sámiráđđi ja Giellaráđđi.
Ovttasbargoforum lea ráhkadan nationála doaibmaplána logijahkái. Nationála doaibmaplána galgá doaibmat giellalogijagibarggu rámman man ulbmil lea seailluhit, čalmmustahttit ja ovddidit sámegielaid Norggas.
Doaibmaplána váldomihttomearit leat fásta olles logijagi áŋgiruššamii. Ásahusat ja organisašuvnnat mat ovddastuvvojit nationála ovttasbargoforumis galget čuovvulit nationála doaibmaplána ja bargat dan ala ahte doaibmaplána mihttomearit ollašuvvet.