Konferánsa čohkke dutkiid, beroštusorganisašuvnnaid, siviila servodaga ja bargiid almmolaš bálvalusain digaštallat vuoigatvuođaid, vealaheami ja fátmmasteami sámi servodagain. Ulbmil lea nannet máhtu doaibmavádjit sápmelaččaid dili birra ja váikkuhit buoret bálvalusaide.
Ann-Elise Finbog
Árvu/Sámediggi
– Easkka maŋimuš logi jagiid lea Sámediggi duođas lokten doaibmavádjit fágasuorggi ja addán dasa dan fuomášumi maid dat ánssáša. Danne lea dát konferánsa deaŧalaš go dat lea mielde čalmmustahttimen doaibmavádjit sápmelaččaid vásáhusaid, hástalusaid ja vuoigatvuođaid. Jus galgat lihkostuvvat oažžut fátmmasteaddji servodaga, de fertejit sámi jienat ja perspektiivvat leat lunddolaš oassin barggus, dadjá sámediggeráđđi Ann-Elise Finbog (SáB).
Guovddáš fáddá konferánssas lea mo ONa konvenšuvdna doaibmavádjit olbmuid vuoigatvuođaid birra (CRPD) sáhttá heivehuvvot eamiálbmotvuoigatvuođaide, sámi gielaide ja kultuvrralašheivehuvvon bálvalusaide. Fágalaš sáhkavuoruid, vásáhuslonuheami ja ságastallamiid bokte galgá konferánsa loktet gelbbolašvuođa ja konkrehtalaš doaibmabijuid mo ollašuhttit CRPD sámi perspektiivvas.
Galgá váikkuhit viidáset ovttasbargui
Konferánsa lea oassin Sámedikki doaibmaplána doaibmavádjit sápmelaččaid vuoigatvuođaid ollašuhttimii 2024-2026 čuovvoleamis. 2025:s ásahii Sámediggi ráđi doaibmavádjit sápmelaččaid váste. Dan oktavuođas čađahuvvojedje vihtta gielddalaš seminára hukset fierpmádaga ja máhtu, ja dát konferánsa čoahkkáigeassá ja hukse viidáseappot daid ala.
Marte Taylor Bye, Dásseárvoguovddáš / Likestillingssenteret KUN– Ulbmil lea ásahit deaivvadanbáikki máhttojuohkimii, gulahallamii ja ovttasbargui dutkanbirrasiid, beroštusorganisašuvnnaid, siviila servodaga ja almmolaš bálvalusaid gaskka, dadjá Marte Taylor Bye, Dásseárvoguovddážis KUN.
Konferánsa galgá leat mielde buorideamen áddejumi daid hástalusaid birra maid doaibmavádjit sápmelaččat vásihit, ja láhčit dili viidáset ovttasbargui čovdosiid birra mat ovddidit searvama, iešmearrideami ja dásseárvosaš bálvalusaid.
Dieđihanáigemearri lea bearjadaga, golggotmánu 30. beaivvi 2026.
Prográmma ja dieđihanskovi gávnnat dáppe.