Prošeakta Luossaságastallan 2024 galgá láhčit bealátkeahtes deaivvadanbáikki gos aktevrrat geain lea duogáš báikkálaš hálddašeamis, politihkas, organisašuvnnain ja departemeanttain deaivvadit ságastallama várás. Prošeakta lea čatnon Deanočázádahkii mas leat oasseváldit Norgga ja Suoma bealde ráji, ja áigumuš lea čađahit njeallje ságastallančoahkkaneami 2024:s.

Sámediggepresideanta Silje Karine Muotka (NSR) lea ilus go Sámediggi sáhttá leat mielde doarjumin prošeavtta mii veahkeha addit árbediehtoguddiide dakkár deaivvadan saji gos besset juogadit iežaset vásáhusaid.

–   Leat olu vuorjašumit movt Deanočázádaga luosaid galgá hálddašit. Dát prošeakta láhčá dili nu ahte iešguđet bealit besset guldalit guhtet guimmiideaset ja juogadit vásáhusaid. Dákkár forat sáhttet váikkuhit ahte áddejupmi buoriduvvo, nubbi nuppi máhttu árvvusadnojuvvo ja buoriduvvo ovttasbargu iešguđet beliid gaskka, dadjá Muotka.

Prošeavtta ulbmil lea čohkket luossahálddašeami iešguđet berošteddjiid ja ságastallama bokte unnidit riidduid. Ságastallančoahkkimiid bokte áigu NVS ráhkadit arena gos ovttasbarget dan guvlui mii lea buoremus sihke álbmogii, kultuvrii ja luossaguvlui. Diibmá čađahedje sullasaš prošeavtta, Luossaságastallan 2023, njeallje ságastallančoagganeami Kárášjogas ja Deanus. 

200 000 ruvdnosaš doarjja addojuvvo Prošeavttat doarjjaortnegis mat ovddidit sámi giela, kultuvrra ja servodateallima dain fylkkagielddain maiguin Sámedikkis lea ovttasbargošiehtadus.