Hamna kystfiske AS lea ožžon 300 000 ruvnno oastit fatnasa ja reaidduid. Fitnodat lea Bossovuonnas Álttá suohkanis ja váldoeaiggát lea Jonas Skorpen Bless.

Eará guolásteaddji Álttás, Bjørn Kåre Preiss, lea ges ožžon 122 000 ruvnno oastit bivdofatnasa. Son orru Lákkovuonas ja doppe son bargá maid boandan lassin dasa ahte bargá guolásteaddjin.

Sámediggeráđđi lea maiddái dorjon aittoálgi guolásteaddji Erik Dalheim Skiervvás 210 000 ruvdnosaš doarjagiin guollebivdofatnasa oastimii.

Dasa lassin lea sámediggeráđđi juolludan 250 000 ruvnno Sollie Båtservice fitnodahkii Bissojogas Porsáŋggus guollebivdofatnasa ja reaidduid oastimii. Fitnodaga eaiggáduššá aittoálgi guolásteaddji Even Johansen.

Dat resursa mas várra lea leamaš stuorámus mearkkašupmi ássanminstarii mearrasámi guovlluin gitta otnáš rádjai, lea guolli. Doarjja fatnasa ja doalu háhkamii, ja dasto infrastruktuvrra ásaheapmi nannámis earret eará guollevuostáiváldin, lea leamaš deaŧalaš oassi Sámedikki váikkuhangaskaomiid geavaheamis.

Silje Karine Muotka– Mii leat ilus go sáhttit doarjut dáid investeremiid ja doaivut ahte doarjagat leat mielde váikkuheame dasa ahte bisuhit ja nannejit barggolašvuođa mearrasámi servodagas, dadjá sámediggepresideanta Silje Karine Muotka (NSR).

Doarjagat addojit doarjjaortnegis Doarjja vuođđoealáhusaide – Mariidnaealáhusat.

Fatnasiid vuosttaš gearddi investeremii sáhttá Sámediggi juolludit doarjaga gitta 35 proseantta rádjai dohkkehuvvon gollogeahčastagas. Stuorámus doarjja oastit geavahuvvon fatnasa lea 250 000 ruvnno ja ođđa fatnasa oastimii lea stuorámus doarjja 300 000 ruvnno. Reaidduide ja dávviriidda go vuosttaš gearddi oastá bivdofatnasa sáhttá Sámediggi addit doarjaga gitta 35 proseantta rádjai dohkkehuvvon gollogeahčastagas ja eanemusat 50 000 ruvnno. Doarjja reaidduide ja dávviriidda sáhttá addojuvvot dušše dan oktavuođas go addo doarjja bivdofatnasa oastimii.