Ulbmil njuolggadusaiguin lea ahte galgá vuđolaččat ja árra dásis árvvoštallot čuvvot go ođđa doaimmat mat evttohuvvojit Finnmárkkulága ulbmilparagráfa, ja eará relevánta lágaid ja riektegeavada, nu ahte bisuhat luondduvuođu ja ovdánahttinvejolašvuođat sámi kultuvrii, ealáhusaide, meahccástallamii ja servodateallimii.

Sámediggi dieđiha dákko bokte ahte ođđa Njuolggadusat meahcceeatnamiid rievdaduvvon ávkkástallanvugiide mearriduvvojedje Sámedikki dievasčoahkkimis geassemánu 8. beaivvi 2023, áššis 026/23. Gielda- ja guovlodepartemeantta dohkkehii njuolggadusaid geassemánu 29. beaivvi 2023. Njuolggadusat gustojit suoidnemánu 1. beaivvi 2023 rájes, ja leat almmuhuvvon Lovdata neahttasiiddus. Ođđa njuolggadusaid gávnnat dáppe.

- Dát ášši lea čuovvoleapmi ovddasvástádusas mii Sámedikkis lea Finnmárkkulága bokte, ja lea illudahtti ahte leat soahpan ođasmahttit njuolggadusaid, dadjá sámediggeráđđi Berit Marie P.E. Eira (JSL).

Ovddeš njuolggadusat, Sámedikki njuolggadusat sámi beroštumiid árvvoštallamii meahcceeatnamiid rievdaduvvon ávkkástallanvugiid oktavuođas Finnmárkkus, geassemánu 11. beaivvi 2007 nr. 738, eai šat gusto dán rájes.