Norgga Girku oažžu doarjaga gitta 300 000 ruvnno rádjai lágidit sámi konfirmántaleairra 2025:s. Sámi girkoráđđi lea máŋggaid jagiid ovttasbargan Davvi-Hålogalándda, Lulli-Hålogalándda ja Nidarosa bismagottiiguin doallat jahkásaš sámi konfirmánttaleairra.

– Mii árvvoštallat ahte sámi konfirmántaleaira lea hui mávssolaš giellaarena sámi nuoraide, ja arena gos sámi nuorat besset oahpásmuvvat ja nannet sin gullevašvuođa, gaskavuođaid ja osku. Dat čájehuvvo maiddái ahte ovddit jagiid čađahuvvon leairrat doibmet bures ja leat čađahahtti ja bivnnut konfirmánttaid gaskka, lohká sámediggeráđđi Elisabeth Erke (Gb).

Ulbmil konfirmánttaleairrain lea earret eará fállat sámi konfirmánttaide sámi konfirmašuvdnaoahpahusa, doarjut nuoraid nannemis iežaset identitehta oassin persovnnalaš ovdáneamis, láhčit dili deaivvademiide sámi nuoraid gaskkas miehtá riikka oahppat dovdat sihke ovttaláganvuođaid ja erohusaid birra sámi gielas ja kultuvrras, ovddidit ustitvuođa sámi birrasiin ja addit sámi konfirmánttaide, beroškeahttá gos orrot, vejolašvuođa deaivvadit eará sámi konfirmánttaiguin Norggas.