Nuorra mátkeealáhusgründer oažžu doarjaga vuoruhit heastavuođđuduvvon mátkeealáhusa

Nuorra mátkeealáhusgründer oažžu doarjaga vuoruhit heastavuođđuduvvon mátkeealáhusa

Sámediggeráđđi lea juolludan 257 000 ruvnno doarjjan Ida Jåmai (21) Raarvihkes Trøndelágas. – Lea hui dehálaš doarjut nuorra sámi gründeriid geat háliidit áŋgiruššat báikkálaččat, dadjá sámediggepresideanta Silje Karine Muotka (NSR).

Ida Jåmas lea ovttaolbmofitnodat, ja sus leat plánat bargat heastavuođđuduvvon mátkeealáhusain čájehan dihte Raarvihke sámi kultuvrra, árbevieruid ja boazodoalu. Vai sáhttá dán oažžut áigái, de dárbbaša cegget stálja. Jåma gullá ieš boazosámi bearrašii ja su bearaš bargá bohccuiguin dán guovllus.

Sámediggepresideanta jáhkká Jåma fitnodatjurdagis lea potensiála olahit bistevaš bargosajiid mátkeealáhusas.

– Juolludeami mihttu lea váikkuhit dasa ahte Jåma sáhttá álggahit sámi mátkeealáhusáŋgiruššama, juoga mii addá birrajagi doaimma, dadjá Muotka.

257 000 ruvdnosaš doarjja addo sámi mátkeealáhusat doarjjaortnegis. Doarjja sáhttá addot mátkeealáhusfitnodagaide miehtá riikka nu guhká go sámi kulturelemeanttat dahket guovddáš oasi mátkeealáhusdoaimmas.

– Jåma orru guovllus gos Sámediggi lea juolludan unnán ealáhusdoarjagiid. Raarvihke lea lullisámi guovlu mas lea potensiála ovddidit sámi mátkeealáhusa, ja Jåma áigumuš fátmmastit sámi kultuvrra, árbevieruid ja boazodoalu dahká ahte dát ohcan meannuduvvui positiivvalaččat sámediggeráđis, dadjá Muotka.

Ida Jåma Privat bilde