2021:s čađahii dutki Torkel Rasmussen guorahallama Sámedikki ovddas, Nuortalašgiela dilálašvuohta Norggas – strategiijat ja doaibmabijut ealáskahttit giela, mii lea addán Sámediggái dehálaš vuođđodieđuid ja oppalašgova barggus mii lea dahkkon nuortalašgiela ovddas sihke Norggas, Suomas ja Ruoššas, ja makkár giellafálaldagat gávdnojit. Guorahallamis evttohuvvojit doaibmabijut giela ealáskahttimii earenoamážit Norgga bealde, muhto ovttasbarggus nuortalaččaiguin Suomas ja Ruoššas.
– Guorahallan lea addán Sámediggái buoret vuođu bidjat johtui gielladoaibmabiju nuortalašgilli, ja lea addán oppalašgova makkár vejolašvuođat leat viidáseappot barggus ealáskahttit nuortalašgiela norgga bealde Sámis, lohká Mikkelsen.
Guorahallan čájeha ahte leat badjelaš 300 olbmo geat hupmet nuortalašgiela ja Norggas leat birrasii 10 olbmo geat hupmet nuortalašgiela. Moattes oahpahit iežaset mánáide nuortalašgiela. Guorahallamis deattuhuvvo ahte deháleamos maid Sámediggi sáhttá dahkat lea láhčit dili nu ahte nuortalaččat norgga bealde sáhttet ealáskahttit sin identitehta, kultuvrra ja dasto vel nuortalašgiela sin iežaset vuogi mielde.
Sámediggi lea lágidan álbmotčoahkkima nuortalašgiela dilálašvuođa birra, ja das čájehuvvui ahte lea beroštupmi seailluhit ja váldit nuortalašgiela ruovttoluotta nuortalaččaid birrasiin norgga bealde Sámis.
Sámediggeráđi evttohus dievasčoahkkimii lea ahte Sámediggi dohkkeha nuortalašgiela sámi giellan Norggas. Sámediggi háliida váikkuhit ahte láhččojuvvo dilli nu ahte šaddá aktiivvalaš nuortalašgiela giellabiras norgga bealde Sámis. Sámediggi áigu ráhkadit sierra vuoruhemiid bušehttii nannet ja ealáskahttet nuortalašgiela, ja bargat dan ala ahte oažžut ovttasbarggu riikkarájiid rastá ealáskahttit nuortalašgiela norgga bealde, ja maid bargat dan ala ahte eanet nuortalaš báikenamat registrerejuvvojit guovddáš báikenammaregistarii nu ahte dat sáhttet geavahuvvot almmolaččat, ovdamearkka dihtii šilttain ja kárttas. Doaibmabijut čuovvoluvvojit jahkásaččat bušeahtas.
Ášši 39/22 Nuortalašgiela ealáskahttin - čuovvulit raportta nuortalašgiela dili birra Norggas meannuduvvo dievasčoahkkimis duorastaga golggotmánu 13. beaivvi.
Jus áiggut jearahallat dahje jus leat gažaldagat, váldde oktavuođa sámediggeráđiin Mikkel Eskil Mikkelsen (NSR), tlf. +47 917 42 161, mikkel.eskil.mikkelsen@samediggi.no
Áššebáhpirat