Nussir-ruvkki álggaheapmi rihkku Norgga lága

Nussir-ruvkki álggaheapmi rihkku Norgga lága

Ruvkedoaibma Nussiris ja Gumppenjunis Riehpovuonas Hámmárfeastta gielddas unnida beliin boazodolliid logu Fieddara orohagas, čájeha váikkuhusguorahallan maid Vuođđudus Protect Sápmi lea dahkan.

Vuođđudus Protect Sápmi lea, go Sámediggi bivddii, dahkan váikkuhusguorahallama mas leat árvvoštallan dáláš areála sisabahkkemiid ovttas plánejuvvon duohtademiiguin. Areálasisabahkken guorahallamat leat laktojuvvon oktii árbevirolaš boazodoallomáhtuin.

Váikkuhusguorahallan čájeha ahte:

  • Orohahkii 22 Fiettar čuohcá garrasit areála sisabahkken go unnimus guohtumat guovlluin Riehpovuonmohkki, Gumppenjunni, Nussir ja Jalgesvárri gáržžiduvvojit sakka.
  • 54 proseantta orohaga 22 Fiettar areálaide čuhcet juo dáláš areála sisabahkkemat.
  • Areála masa čuohcá lassána 70 proseanttain, ođđa 420 kV fápmolinjá geažil Skáidái ja ruvkedoaimma geažil Nussiris ja Gumppenjunis.
  • 70 proseantta areálaide čuohcan lea mealgat badjelis dan ráji maid boazodoallu gierdá jos galggaš ceavzit. Boazolohku ferte unniduvvot birrasii 50 proseanttain. Go boazolohku molsašuddá siidaosiid gaskka, de mearkkaša dat dan ahte gaskal 6 ja 10 orohaga 14 siidaoasi gaskkas  fertejit heaittihuvvot.
  • Guoskevaš areála lea guottetbáikkis ja eanemus buvttadeaddji guohtonguovlluin mat leat áibbas vealtameahttumat bohcco birgemii birra boazodoallojagi.
  • Sisabahkken gáržžida dietnasa hui garrasit ja lasiha goluid sakka.
  • Orohaga 20 Fálá čakčajohtolat meattá Gumppenjuni giddana geavahusas, earret eará danne go čohkken- ja orrunguovllut ovdal ja maŋŋá johtima váikkuhuvvojit. Dát rihkku boazodoallolága paragráfa 22 dan ektui ahte boazodoalu johtinmáđijat eai galgga giddejuvvot.
  • Váidudeaddji doaibmabijut ruvkelobis eai sihkkarastte dan ahte boazodoallu sáhtášii bisuhuvvot ain ekonomalaččat.

Loga olles váikkuhusguorahallama: Analyse av virkningen for reindriften ved planlagt gruvedrift i Nussir og Ulveryggen i Kvalsund kommune (PDF, 24 MB)

– Dat mii dás lea dahkkojuvvon lea hui vuđolaš váikkuhusguorahallan ja mas daddjojuvvo čielgasit ahte ruvkedoaibma ii sáhte doaibmat seamma sajis gos boazodoallu lea, ja boazodoallu seammás leat gánnáhahtti buot orohaga siidaoasseoamasteddjiide. Dát mearkkaša dan ahte ruvkelohpi rihkku Norgga ja riikkaidgaskasaš lágaid, dadjá sámediggeráđđi Silje Karine Muotka (NSR).

Stáhta ii sáhte olmmošvuoigatvuođalága ja ON konvenšuvnna siviila ja politihkalaš vuoigatvuođaid birra 27. artihkkala mielde addit lobi areálasisabahkkemiidda mat dagahit dan ahte sámi boazodoallu biehttaluvvo dahje ollu loavkašuhttá nu ahte ii leat šat vuođđu ovttaskas kulturbargui doaibmaguovllus. Dása leat sihke Stuorradiggi ja Alimusriekti guorrasan.

– Dál leat mii ožžon vuđolaš fágalaš árvvoštallama mas čielgasit oaidnit ahte lassá masa stáhta sáhttá addit lobi dás lea rasttilduvvon. Dát guorahallan addá fágalaš vuođu dasa ahte ráđđehusa Nussir-ruvkelohpi ii leat lobálaš. Váikkuhusguorahallan addá vuođu ovddidit sierra ášši Sámedikki dievasčoahkkimii plánejuvvon Nussir-ruvkke viidáset čuovvuleamis, dadjá sámediggeráđđi Muotka loahpas.

Gažaldagaide vástida dahje addá jearahallama sámediggeráđđi Silje Karine Muotka (NSR), mob. +47 984 87 576, silje.karine.muotka@samediggi.no