– Mii dovdat daid ekonomalaš hástalusaid maiguin olu bearrašat rahčet Finnmárkkus ja Davvi-Romssas, nu ahte danne šaddá nuvttá mánáidgárdesajiid ortnet buot mánáide buorren fálaldahkan. Dát sihkkarastá ja nanne máŋgga smávvamánnábearraša bearašekonomiija, dat dahká diehttevašvuođa ja rievdada maid eretfárrenhástalusaid máŋgga sámi suohkanis, dadjá Mikkelsen.

Sámedikki statistihkka čájeha ahte riikkas leat 893 máná geain lea sámi mánáidgárdefálaldat, ja dáin leat 665 máná geain lea sámi mánáidgárdefálaldat Finnmárkkus ja Davvi-Romssas.

– Mun háliidan rámidit Distriktsdemografi-lávdegotti, mii árvalii nuvttá mánáidgárdesajiid rievttes ja dehálaš doaibman movttiidahttit eanet nuoraid fárret guovllusuohkaniidda. Rehketbihttá čájeha ahte sámi bearrašat Finnmárkkus ja Davvi-Romssas jahkásaččat mákset lagabui 22 miljovnna ruvnno mánáidgárdemáksun, ja dál eai dárbbaš šat máksit dán rehkega, ja dan ovddas lea Sámediggi guhká bargan, dadjá Mikkelsen.

– Ortnet ferte viiddiduvvot eará sámi guovlluide

Sámediggeráđđi Mikkelsen oaivvilda ahte nuvttá mánáidgárdeortnet maiddái ferte viiddiduvvot eará sámi guovlluide maid, nugo Romsii, Nordlándii, Trøndelágii, Oslo/Vikenii ja Innlandetii. Sámedikki bajilgeahčestat čájeha ahte leat 228 máná geat ožžot sámi mánáidgárdefálaldaga 24 mánáidgárddis - Romssas davvin gitta Osloi lullin.

– Jus buot sámi mánáide attáše nuvttá mánáidgárdesaji, de dát ortnet šattašii máksit dušše 7,5 miljovnna lulábealde Davvi-Romssa. Mii Sámedikkis háliidit oktasaš servodatloktema sámi bearrašiidda. Dat lea buorre guovllupolitihkka ja hui buorre giellapolitihkka, loahpaha Mikkelsen.

Jearahallama addá sámediggeráđđi Mikkel Eskil Mikkelsen (NSR), tel. +47 917 42 161, mikkel.eskil.mikkelsen@samediggi.no