Sámediggeráđđi lea juolludan ovddidanruđaid ja buhtadan vánhenmávssu ortnega bokte Nuvttá sámegielat mánáidgárdesajit olggobealde ráđđehusa geográfalaš vuoruheami nuvttá mánáidgárdefálaldaga ektui.
Leat 13 sámi mánáidgárddi ja ossodaga mat leat dahkan ovdánahttinšiehtadusa Sámedikkiin, ja mihttomearrin lea ahte mánáidgárddit galget leat sámegielalaččat ovdal jagi 2026. Sámedikkis leat leamaš álggahančoahkkimat buot 13 mánáidgárddiin dán čavčča.
– Leat leamaš máŋga čoahkkima juohke mánáidgárddiin, ja vuoruheapmi lea ollásit doibmiibiddjon. Mii leat sávvan buot sámi mánáidgárddiide ja ossodagaide olggobealde ráđđehusa doaibmaguovllu bures boahtima ja danne illudahttá go buohkat servet áŋgiruššamii. Mun dulkon searvama dainna lágiin ahte ortnet lea bivnnut ja háliiduvvon, dadjá Mikkelsen.
Mánáidgárddit ja ossodagat leat ožžon oktiibuot 2 600 000 ruvnnu ovddidanprošeavttaide, ja leat ožžon váhnenmávssu buhtaduvvot oktiibuot 2 511 824 ruvnnu ovddas 2023 čavčča.
Guovddáš oassi ortnegis lea rekrutteren
Juohke mánáidgárdái lea maid juolluduvvon 200 000 ruvdno ovddidanruhtan, mii galgá gokčat goluid giellabarggu gelbbolašvuođa- ja kvalitehtaovddideamis ja sámi mánáidgárddiid ja ossodagaid pedagogalaš sisdoalus.
– Sámediggi lea dáinna mielde dagaheamen mánáidgárddiid geasuheaddjin váhnemiidda, seammás go mii sihkkarastit ruđaid mánáidgárddiid ovddideapmái sámegielat pedagogalaš bargiid rekrutterema ja gelbbolašvuođa loktema bokte. Min ortnegat sihkkarastet rekrutterema ja ovdáneami, dadjá Mikkelsen.
Dát ortnet nuvttá sámegielat mánáidgárddiide doaibmagođii borgemánu 1. beaivvi rájes dán jagi. Ortnet galgá doaibmat golbma jagi. Mánáidgárddit galget dán áigodagas bargat ovddidanbargguin nannen dihtii sámi giellagelbbolašvuođa ja pedagogalaš sisdoalu. Golmma jagi geahčen galgá ortnet evaluerejuvvot ortnega ulbmila ektui.
– Mii dárbbašit eanet sámegielagiid. Mánáidgárdi lea deháleamos ja stuorámus giellamovttiidahttinarena mii mis lea Sámis. Mun sávan buohkaide bures boahtima sámegielat searvevuhtii ja sávan ahte eanebut válljejit sámi mánáidgárdefálaldaga, dadjá Mikkelsen.
Dát 13 mánáidgárddi leat dahkan ovdánahttinšiehtadusa Sámedikkiin:
| Suohkan | Mánáidgárdi/Ossodat |
| Bådådjo suohkan | Jentoftsletta barnehage, Ossodat Giella |
| Loabága suohkan | Lauvmakken barnehage, Ossodat Fiskes |
| Dielddanuori suohkan | Márkománák sámi mánáidgárdi |
Rossen tjïelte | Luvlege maanagïerte, Ossodat Svaale |
| Brekken barnehage, sámi ossodat |
| Romssa suohkan | Guovssahas mánáidgárdi |
| Sjømannsbyen barnehage, Ossodat Mearranásti |
| Gimle studentbarnehage, Ossodat Gearpmaš |
| Hábmera suohkan | Viejega AS |
| Tråanten tjïelte | Feristafriluftsbarnehage, Ossodat Belnie |
| Raarvihken tjïelte | Raarvihken maanagïerte, Ossodat Gaavalohke |
| Snåasen tjïelte | Suaja maanagïerte |
| Oslo suohkan | Cizáš Oslo sámi mánáidgárdi |