– Ráđđehus hoahpuha doaibmalohpeproseassaid olles leahtuin NVE:s, muhto ii leat láhčán diliid buoret váikkuhusguorahallamiidda nugo lea lohpiduvvon doaibmabidjopáhkas boazodoalu ja energiija váste, mii almmuhuvvui jagis 2023. Dá ii leat buorre álgu Kraftløft Finnmark -áŋgiruššamii, dadjá Bjørkmo Lifjell.

NVE ii vuordde dassážii go ođđa metodihkka boazodoalu árvvoštallama váste váikkuhusguorahallamiin, mearriduvvo. Ođđa metodihka ovddideami bargu álggahuvvui oktan njulgendoaibmabidjun Fovse-duomu maŋŋel. Lohpádusat dan birra ledje oassin ráđđehusa doaibmabidjopáhkas boazodollui ja energiijai, ja dat deattuhuvvojedje go ráđđehus almmuhii Muolkkut-áŋgiruššama ja Kraftløft Finnmark -áŋgiruššama. Ole-Henrik Bjørkmo Lifjell reagere go ráđđehus ii čuovvol lohpádusaid.

– Boazodoalu árvvoštallama metodihka ođasmahttin váikkuhusguorahallamiid oktavuođas, lea mielddisbuktán stuora vuordámušaid das ahte dál viimmat sajáiduvvá lahkonanvuohki mii láhčá buriid ja ovttaárvosaš proseassaid. Geaidnodoaimmahaga ovddeš metodihkka ii leat doarvái buorre. Mii oaidnit ahte oallugat, geat dál vásihit ahte dát proseassat Finnmárkkus ovddiduvvojit beroškeahttá das maid Fovse-áššis leat oahppan, leat behtton ja duššástuvvan, joatká Bjørkmo Lifjell.

Váikkuhusguorahallamiin galgá boahtit ovdan movt huksemat sáhttet čuohcat iešguđet servodatberoštusaide, nugo boazodollui ja sámi meahcásteapmái. Erenoamáš dehálaš lea árvvoštallat šaddá go ollislaš noađđi beare stuoris orohagaide maidda dat guoská. Dá lea oassi árvvoštallamis ON olmmošvuoigatvuođakonvenšuvnna 27. artihkkala vuođul. Vuđolaš čielggademiid haga lea dakkár árvvoštallamiidda unnán luohttámuš.

Danne lei Sámediggái dehálaš go lei konsultašuvnnain NVE:in, ahte plánaid ja doaibmabijuid ollislaš váikkuhusat orohahkii bohtet ovdan. Dasto Sámediggi gáibidii ahte vuoigatvuođalaččat besset váikkuhit váikkuhusguorahalli válljemii, ahte guorahallamiin deattuhuvvo álgoálbmotmáhttu ja ahte biddjojuvvojit einnostahtti gáibádusat konsuleantaveahki goluid máksimii boazodolliide.

– Oainnán ahte NVE eaktuda ahte doaimmaid álggaheaddjit galget boazodolliide láhčit vejolašvuođa leat mielde čielggadanbarggus nu ahte mákset sin dárbbašlaš goluid. Sámediggi čielgasit vuordá ahte dasa maiddái gullet golut dárbbašlaš juridihkalaš veahkkái ja eará áššedovdiveahkkái, dadjá Bjørkmo Lifjell.

Sámediggeráđđi lea fuolas das makkár luohttámuš prosessii šaddá ja dadjá ahte Sámediggi dárkilit áigu gozihit ášši.

– «Kraftløft Finnmark» áŋgiruššama ii berre hoahpuhit olles leahtuin jus dat sáhttá dagahit olmmošvuoigatvuođaid ovdii, dadjá Bjørkmo Lifjell.