A. H Länsman Fisk AS lea Vuonnabađas ja lea ožžon 175 000 ruvdnosaš doarjaga oastit bivdofatnasa. Fitnodaga ulbmil lea bargat vuotna- ja riddobivdduin. 

Unjárgga gielda lea ealáhusovddideami doarjjadoaibmaguovllus, ja dan dihte lea vejolaš doarjut fitnodaga. 

– Illudahttá sakka go rekrutteren guolástusaide lassána, ja erenoamážit illudahttá dat go nissonolbmot áigot bargat guolástemiin, dadjá sámediggepresideanta Silje Karine Muotka (NSR).

Sámediggepresideantta mielas lea deaŧalaš ahte Sámediggi doarju sin geat háliidit bargat guolástusealáhusas.

– Dán lágan áŋgiruššan sáhttá addit maiddái eará oalgeváikkuhusaid, nugo ovdamearkka dihtii leat mielde sihkkarastimin sámi ássama rittuin.

175 000 ruvdnosaš doarjja juolluduvvo doarjjaortnegis Doarjja vuođđoealáhusaide - mariidna ealáhusat.

– Sámediggi háliida ahte eambbogat barggašedje guolástusain, ja danne lea mis doarjjaortnet movttiidahttin dihtii oastit fatnasa vai eambbogat álggášedje riddolagaš bivdui, dadjá sámediggepresideanta.