Sámediggeráđđi Ann-Elise Finbog vuolláičálii gaskavahkku njukčamáno 25. beaivvi ovttasbargošiehtadusaid mánáidgárddiid váhnenlávdegottiin (FUB) ja vuođđooahpahusa váhnenlávdegottiin (FUG). Šiehtadusa bokte áigot nannet sámi mánáid ja nuoraid rievtti oadjebas ja buori bajásšaddanbirrasii vuođđuduvvon sámi gielas, kultuvrras ja árvvuin.

– FUB ja FUG leat guovddáš ovttasbargo guoimmit Sámedikkis áššiin mat gusket ovttasbargui gaskal ruovttu ja mánáidgárddi ja skuvlla. Sii ovddastit váhnemiid jiena bajásšaddansuorggis, ja mii leat hui duhtavaččat go leat sámi áirasat lávdegottiin. Váhnemiid jiena lea dehálaš váldit vuhtii viidáset barggus mánáidgárde- ja skuvlasuorggis, dadjá sámediggeráđđi Finbog.

Sámediggi lea ovttasbargan FUB:in ja FUG:in 2010 rájes, ja lea ilus ahte ovttasbargu joatkkašuvvo. 2024 – 2027 áigodagas leaba Amalie Risten Rimpi ja Lill-Therese Varsi sámi áirasat FUB:s ja FUG:s.

Váldočuoggát ovttasbargošiehtadusas:

• Nannet bargoveaga, ja psykososiála birrasa mánáidgárddis ja skuvllas
• Sihkkarastit ahte buot mánáid ja nuoraid oidnet ja dustejit dakkárin go sii leat
• Fuolahit mánáid ja nuoraid vuoigatvuođa sámegielat oahpahussii ja fálaldagaide
• Láhčit dili buoret diehto-, vásáhus- ja máhttojuohkimii
• Čalmmustahttit FUB ja FUG aktiivvalaš ovttasbargoguoibmin ja doarjjan Sámediggái sámi mánáidgárde- ja skuvlasuorggis

Loga Vuođđooahpahusa váhnenlávdegotti (FUG) ja Sámedikki gaskasaš ovttasbargošiehtadusa áigodagas 2025-2027 (PDF, 215 kB)

Loga Mánáidgárddiid váhnenlávdegottiin (FUB)  ja Sámedikki gaskasaš ovttasbargošiehtadusa áigodagas 2025-2027 (PDF, 158 kB)

Sámediggeráđđi Ann-Elise Finbog ja FUG jođiheaddji Ståle Sand Kalkvik

FUB jođiheaddji Tor‑Eirik Rasmussen ja sámediggeráđđi Ann-Elise Finbog

FUG: FUG nubbinjođiheaddji Johanne Marie Olaussen Sámediggeráđđi Ann-Elise Finbog FUG jođiheaddji Ståle Sand Kalkvik FUG sámi áirras Lill‑Therese Varsi