Ulbmil lea addit duojáriidda daid reaidduid maid sii dárbbašit lihkostuvvat álggahit dahje ovddidit iežaset fitnodaga, earret eará dakko bokte ahte stivret iežaset ekonomiija, bargat haddebidjamiin, buorebut márkanastit iežaset, ja ráhkadit vejolašvuođaid olahit ođđa kundariid sihke nationála ja riikkaidgaskasaš dásis.

Elisabeth Erke Ørjan Marakatt Bertelsen

– Áŋgiruššan fállá bagadallama ja resurssaid veahkehit duojáriid ovddidit gánnáhahtti fitnodagaid, lasihit iežaset márkanoasi ja buoridit iežaset gávpedáidduid. Dát fátmmasta buot márkanastima rájes gitta vuovdimii ja ekonomiijastivremii ja buvttaovddideapmái, dadjá sámediggeráđđi Elisabeth Erke (Gb).

Sámedikkis leat vuordámušat oaidnit dán prográmma positiiva váikkuhusaid ja ávžžuha berošteaddji duojáriid ohcat ja searvat prográmmii.

Nuvttá bagadallan ja fágalaš fálaldagat

Sápmi Ealáhusgárdi lea ođđa áŋgiruššama lágideaddji, mii fállá bagadallama, gelbbolašvuođaloktema ja fierpmádatvejolašvuođaid duojáriidda.

– Prográmma oasseváldit ožžot nuvttá bagadallama, kurssaid ja fierpmádatčoahkkimiid. Sápmi Ealáhusgárdi fállá individuála bagadallama, gávpeovddidankurssa, ja duodjeiđitborramušaid - digitála deaivvadanbáikki vásihusaid juogadeapmái ja fágalaš deavddan, muitala prošeaktajođiheaddji Antje Schlecht Valio.

Business StartUp workshop lea prográmma guovddáš oassi, mas duojárat ožžot reaidduid dasa ahte hukset iežaset fitnodaga, bargat haddebidjamiin, ekonomiijastivremiin ja gávdnat ođđa márkaniid.

Stuora beroštupmi duojáriid bealis

Duorastaga guovvamánu 13. b. čájehii Sápmi Ealáhusgárdi prošeavtta Duojáriid Ealáhussearvvi doaluin Kárášjogas, DES Deaivvadeamis. Oasseváldit válde prošeavtta hui bures vuostá. Okta sis lei duojár Ann Solveig Nystad, gii oaivvilda ahte dát vuolggaheapmi lea deaŧalaš ealáhussii.

– Buot prošeavttat mat čujuhit duodjái ealáhussan leat bures boahtin, ja lea hui buorre go dasa biddjojuvvojit návccat, dadjá son.

– Ollu duojáriin lea niehku sáhttit birget dainna, muhto duohtavuohta lea ahte eatnašiin ferte leat eará dienasgáldu lassin eanaš áiggi.

Nystad čujuha maiddái dasa ahte vuolggaheapmi sáhttá leat deaŧalaš Sámi boahtteáigái.

– Vai nuorat šaddet kulturguoddin ja fievrridit duodjeárbevieruid viidáseappot, de ferte ealáhus ovddiduvvot nu ahte dat lea sihke gánnáhahtti ja geasuheaddji.

Rabas dieđiheapmái

Prošeakta lea rabas buot duojáriidda geat háliidit nannet iežaset doaimma. Sámediggi ávžžuha berošteddjiid dieđihit iežaset ja searvat prográmmii.

Prográmma lea rabas buohkaide, leš dal aitto álgán dahje leamaš jođus muhtun áiggi, ja dat lea sorjjasmeahttun organisašuvdnagullevašvuođa ektui.

Loga eambbo prošeavtta birra Sápmi Ealáhusgárddi neahttasiiddus