Sámedikkis lea jagi 2020 rájes leamaš ovddasvástádus sámi fanassuodjaleamis. Rabas, durrojuvvon fatnasat dat leat sámi fanassuodjaleami vuođus, muhto mis váilu bajilgovva fatnasiin mat ain gávdnojit, man ollu dat leat ja gos dat leat. Go galgá hálddašit juoidá, de ferte vuos háhkat bajilgova das mii galgá hálddašuvvot. Sámedikkis ii leat alddis vejolašvuohta ráhkadit dakkár bajilgova. Danne dárbbašit gelbbolaš birrasiin veahki ráhkadit bajilgova iežaset geográfalaš guovlluin dahje dihto fanasšlájas. Áigemearri válbmet prošeavtta lea golbma jagi das rájes go doarjja juolluduvvo.

Fatnasat leat dávjá návsttuin, garášain dahje návehiin, muhtun fatnasat leat olgun, ja muhtun fatnasat soitet govddodit mearas ja leat gitta áŋkoris dahje boijas. Dat leat gárbát/femberet, spissát, johkafatnasat, báškkenat, fávlefatnasat/nuohttefatnasat ja earálágan fatnasat. Ii leat vejolaš buotlágan fatnasiid áimmahuššat, muhto mii fertet fuolahit ahte ollu fanasšlájat seailluhuvvojit boahtteáigái. Fatnasat leat fanashuksenvieruid máhttogáldut ja mávssolaš oassi sámi kultuvrras.

Mana siidui Doarjagat sámi kulturmuitosuodjalussii