Sámedikki dievasčoahkkin mearridii Šattolaš Sápmi – Sámediggedieđáhus ealáhusovdáneami birra juovlamánus 2019:s. Sámediggi galgá dán vahku dievasčoahkkimis meannudit ášši sámediggedieđáhusa rievdadeami birra.
Loga Šattolaš Sápmi – Sámediggedieđáhus ealáhusovdáneami birra (2019)
Sihke koronapandemiija ja globála ekonomiija ovdáneapmi dagaha hástalusaid ealáhuseallimii sámi guovlluin. Ollu fitnodagat rahčet. Dat čuohcá earenoamážit ealáhusaide mat leat sorjavaččat ahte geavaheaddjit bohtet fitnodagaide oastit gálvvuid dahje bálvalusaid. Dat guoská mátkkoštanealáhusaide ja eará bálvalusfidnosurggiide, ja fievrridansuorgái.
Silje Karine Muotka
Árvu/Sametinget
– Dán ovdáneami váikkuhus lea ahte oallugat leat šaddan juogo unnidit sin doaimma, bidjat eret bargiid dahje heaittihit doaimma. Dá oassi čilgehusas manne Sámediggi lea válljen ođasmahttit ealáhusdieđáhusa, lohká Muotka.
Oktanaga dáinna de joatká eretfárren sámi guovlluin ja dat geat vel báhcet boarásnuvvet. Stuorit báikkit ja gávpogat leat dat vuoitit go lea sáhka olmmošlogu lassáneami birra. Gávpogat eai dárbbat rahčat seamma ollu go unnit báikkit oažžun dihte olbmuid fárret dohko.
– Dat unnimus suohkanat fertejit iežaset dahkat geasuheaddjin orruma ja barggu ektui. Jus dan dahket, de jáhkán ahte sii nagodit ráddjet eretfárrema. Sámediggi aŋkke galgá dahkat dan maid sáhttá ruhtadit ásahemiid mat leat gánnihahttit ja mat sihkkarastet orruma, muhto mii leat gitta das ahte stuorit ruhtadanásahusat dorjot dakkár ásahemiid, lohká Muotka.
Sámediggepresideantta oaidná ahte lea leamaš positiivvalaš ovdáneapmi muhtin ealáhusain ja earenoamážit guolásteamis daid maŋemuš jagiid. Ollu suohkanat vásihit ahte guollefatnasat lassánit ja leat eambbo guolásteaddjit geain lea buorre ekonomalaš ovdáneapmi. Dát guoská earenoamážit sidjiide geat sáhttet bivdit gonagasreabbá.
Dainna rievdaduvvon dieđáhusain sávvá Muotka ahte Sámediggi oažžu ávkkálaš reaidduid láhčit dili ealáhusovdáneapmái sámi guovlluin.
– Mun jáhkán ahte lea vejolaš ollašuhttit daid mihtuid maid mii leat bidjan Šattolaš Sápmi dieđáhusas, muhto dat ekonomalaš rámmaeavttut mat biddjojit earret eará stáhtabušeahtas ja ealáhusšiehtadusain fertejit leat buorit sámi guovlluid ealáhusdoibmii, lohká Muotka.
Ášši meannuduvvo dievasčoahkkimis duorastaga golggotmánu 13. beaivvi.
Loga áššebáhpiriid áššái 42/22 Šattolaš Sápmi Ceavzilis ealáhusovdánahttin - Sámediggedieđáhusa rievdadeapmi
Jus áiggut jearahallat dahje jus leat gažaldagat, váldde oktavuođa sámediggepresideanttain Silje Karine Muotka (NSR), tlf. +47 984 87 576, silje.karine.muotka@samediggi.no