Inger Elin Utsi Tommy Hansen

Utsi bargá dál seniorráđđeaddin UiT Norgga árktalaš universitehta gulahallanossodagas Álttás. Son lea ovdal bargan seniorráđđeaddin Duohtavuođa- ja soabahankommišuvnnas, ráđđeaddin Finnmárkku allaskuvllas, vuorrohoavdan ja journalistan TV Nord:as, ja journalistan NRK:s ja Mediehuset Altaposten:is.

Utsis lea bachelor servodatdiehtagis, prošeaktajođiheamis, journalistihkas ja almmolaš hálddašeamis/ekonomiijas. Sus lea maiddái masterfága márkananalysas ja finansiealla analysas, sus lea digitaliserengelbbolašvuohta ja gelbbolašvuohta strategalaš jurddašeamis.

– Inger Elin lea aktiiva olmmoš geas leat olu doaimmat. Son bures ipmirda politihkalaš proseassaid. Mus lea buorre jáhkku dasa ahte son positiivvalaččat váikkuha Sámedikki gulahallanbarggu ovdáneami ja mun illudan suinna bargat ovttas, dadjá Sámedikki direktevra Inger Marit Eira-Åhrén.

Utsi lea Guovdageainnus eret ja davvisámegiella lea su eatnigiella. Su bargobáiki galgá leat Sámedikki kantuvrras Guovdageainnus.

Gulahallanhoavddas lea ovddasvástádus jođihit strategalaš barggu gulahallamis, mediagulahallamis ja beagginhuksemis, jođihit ovttadaga fágalaš doaimmaid, organisašuvdnaovddideapmi ja bargiid čuovvoleapmi. Gulahallanhoavddas lea ovddasvástádus ovttadaga bohtosiidda, bušehttii ja bargiide, ja lea mielde Sámedikki jođihanjoavkkus ja raportere Sámedikki direktevrii.