Dieđáhus mearriduvvui álggos jagis 2021 ja dan rájes leat kulturmuitosuorggis leamašan mearkkašahtti rievdadusat sihke diehtovuođus, teknologiijas ja servodatovdáneamis.

– Kulturmuitohálddašeami váikkuhit fáktorat omd. gávpotluvvan, mátkkoštanealáhusat, dálkkádatrievdadeamit ja ođđa teknologiija. Dáinna ođasmahttojuvvon dieđáhusain dáhttu Sámediggi sihkkarastit ahte sámi kulturmuittuid hálddašeami vuođđu lea sámi historjá, árvvut ja máhtu – buoremussan dálá ja boahttevuođa buolvvaide, dadjá sámediggeráđđi Runar Myrnes Balto.

Áimmahuššan čujuha man guvlui Sámedikki bargu sámi kulturmuittuin ja vistegáhtten lea, ja lea dehálaš reaidun álgoálbmothálddašeames. Kulturmuittut eai leat dušše historjjálaš luottat, muhto maiddái vuođđun gullevašvuhtii, vuoigatvuođabargui ja guoddevaš areálageavaheapmái.

Reviderejuvvon dieđáhus sisdoallá erenoamážit dáid ođasmahttimiid:

• Juridihkalaš rámmat
• Sápmelaš olbmobázahusaid ja bassibáikkiid hálddašeapmi
• Metodalaš vuođus ja álgoálbmotvuođđuduvvon hálddašeapmi
• Vistegáhtten ja fievrogáhtten

Loga olles dievasčoahkkinášši dás